ព្រះសីហនុ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូប​នីយកម្ម និងសំណង់ បានចាត់ទុកខេត្តព្រះសីហនុ កំពុងឈានមុខគេ ក្នុងការ​ទ្រទ្រង់​ការ​អភិវឌ្ឍ​សេដ្ឋកិច្ច​នៅ​ក្នុងតំបន់ និងរបៀងសេដ្ឋកិច្ចតំបន់ឆ្នេរកម្ពុជា ជាមួយនឹងការអនុវត្តយ៉ាងខ្ជាប់ខ្ជួន នូវ​យុទ្ធសាស្រ្តបញ្ចកោណដំណាក់កាលទី១ លើគោលនយោបាយជាអាទិភាពចំនួន ៦ចំណុច និង​វិធានការ​គន្លឹះទាំង៥ របស់រាជរដ្ឋាភិបាល ។

ក្នុងកិច្ចប្រជុំបូកសរុបលទ្ធផលការងារប្រចាំត្រីមាសទី១ ឆ្នាំ២០២៤ ក្រុមការងារ​រាជរដ្ឋាភិបាល​ចុះ​មូល​ដ្ឋាន​ខេត្ត និងជំរុញការងារចុះបញ្ជីដីធ្លី ក្នុងភូមិសាស្រ្តខេត្តព្រះសីហនុ កាលពីថ្ងៃទី៧ ខែ​ឧសភា ឆ្នាំ២០២៤ ឯកឧត្តមឧបនាយករដ្ឋមន្ត្រី មានប្រសាសន៍ថា ក្នុងនាម​ជា​ខេត្ត​កំពុង​ឈាន​មុខ​លើ​វិស័យសេដ្ឋកិច្ច នៃតំបន់ឆ្នេរនេះ ខេត្តព្រះសីហនុគួររៀបចំក្រុង ឱ្យមាន​លក្ខណៈ​ស្តង់ដា​រួម​មួយ ដោយគិតគូរអំពីលំហសាធារណៈ ដោយមានផ្លូវថ្មើរជើង សម្រាប់​ប្រជាព​លរដ្ឋ​ហាត់​ប្រាណ​ដើម្បី​សុខភាព មានដើមឈើ មានភាពបៃតងនោះ នាពេលខាងមុខ​ទីក្រុង​នឹង​មាន​សោភ័ណ​ភាព​កាន់​តែ​ស្រស់ស្អាត ទាក់ទាញ ផ្តល់នូវផាសុកភាព និងងាយស្រួលក្នុងការរស់នៅ ។

ឯកឧត្តម សាយ សំអាល់ ក៏បានជំរុញអាជ្ញាធរខេត្ត ឱ្យគិតគូរយកចិត្តទុកដាក់ ក្នុងការ​ថែ​រក្សា​សន្តិសុខ និងសុវត្ថិភាពឱ្យកាន់តែប្រសើរឡើង សម្រាប់ប្រជាពលរដ្ឋ ក៏ដូចជាភ្ញៀវទេសចរជាតិ និង​អន្តរជាតិដែលមកកំសាន្ត ឬមកបណ្ដាក់ទុនវិនិយោគក្នុងខេត្តព្រះសីហនុ ជាមួយ​នឹង​ការ​ខិតខំ​ពន្លឿន​ការ​ចុះបញ្ជីដីធ្លីជាប្រព័ន្ធ។

គួរបញ្ជាក់ថា គោលនយោបាយអាទិភាព៦ចំណុច របស់រាជរដ្ឋាភិបាល រួមមានទី១. ការពង្រីក​សេវា​ថែ​ទាំ​សុខភាព, ទី២. ការបណ្តុះបណ្តាលជំនាញវិជ្ជាជីវៈ និងបច្ចេកទេស, ទី៣. ការធ្វើ​ស្ថាបនូបនីយកម្ម​កម្មវិធីជាតិជំនួយសង្គម, ទី៤. ការដាក់ចេញយុទ្ធសាស្ត្រស្តីពី ការអភិវឌ្ឍ​សេដ្ឋកិច្ច​​ក្រៅប្រព័ន្ធ, ទី៥. ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន សំដៅ​លើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ; និងទី៦. ការដាក់ពង្រាយមន្ត្រីបច្ចេកទេសកសិកម្ម ទៅគ្រប់ឃុំ-សង្កាត់ ដែលមាន​សកម្ម​ភាព​កសិកម្ម​នៅទូទាំងប្រទេស និងការរៀបចំឱ្យមានសមាគមកសិករនៅតាមទីជនបទ ៕ អត្ថបទ៖ បាន សុខរិទ្ធិ