វីដេអូដែលត្រូវបានថត កាលពីថ្ងៃអង្គារបង្ហាញអ្នកធ្វើដំណើរជាច្រើននាក់កំពុងតម្រង់ជួរ ក្នុងជួរដ៍វែងនៅកន្លែងពិនិត្យលិខិតឆ្លងដែន ខាងក្នុងស្ថានីយអាកាសយានដ្ឋាន Heathrow ក្នុងទីក្រុងឡុងដ៍ ខណៈដែលប្រព័ន្ធព្រំដែនរបស់ចក្រភពអង់គ្លេស ត្រូវបានរាយការណ៍ថាមានការដាច់ចរន្តអគ្គិសនី។

ជួរដ៏វែងបានបង្កើតឡើងនៅអាកាសយានដ្ឋានអង់គ្លេសកាលពីយប់ថ្ងៃអង្គារ បន្ទាប់ពីកម្លាំងព្រំដែនរបស់ប្រទេសនេះបានទទួលរងបញ្ហាបច្ចេកទេសទូទាំងប្រទេស ដែលធ្វើឲ្យប៉ះពាល់ដល់ការគ្រប់គ្រងលិខិតឆ្លងដែន។

អាកាសយានដ្ឋានឈានមុខគេរបស់ចក្រភពអង់គ្លេស រួមមាន អាកាសយានដ្ឋាន Heathrow, Gatwick អាកាសយានដ្ឋានStanstedនៅភាគខាងត្បូង អាកាសយានដ្ឋានManchesterនៅអង់គ្លេសភាគខាងជើង និងអាកាសយានដ្ឋានEdinburgh ក្នុងដែនដីស្កុតឡេន បាននិយាយថា ពួកគេដឹងពីបញ្ហាកើតមាននៅទូទាំងប្រទេស ហើយបុគ្គលិករបស់ពួកគេកំពុងធ្វើការជាមួយមន្ត្រីកម្លាំងព្រំដែន ដើម្បីជួយដោះស្រាយបញ្ហា។

Border Force ឬកម្លាំងព្រំដែន គឺជាទីបញ្ជាការអនុវត្តន៍ច្បាប់នៅក្នុងការរិយាល័យក្រសួងមហាផ្ទៃ ដែលធ្វើប្រតិបត្តិការត្រួតពិនិត្យលិខិតឆ្លងដែន និងច្រកអេឡិចត្រូនិចនៅ អាកាសយានដ្ឋាន។

អាជ្ញាធរនិយាយថា យើងកំពុងធ្វើការយ៉ាងជិតស្និទ្ធជាមួយកម្លាំងព្រំដែន និងអាកាសយានដ្ឋានដែលរងផលប៉ះពាល់ ដើម្បីដោះស្រាយបញ្ហានេះឱ្យបានឆាប់តាមដែលអាចធ្វើទៅបាន និងសូមអភ័យទោសដល់អ្នកដំណើរទាំងអស់ចំពោះការរំខានដែលបានបង្កឡើង។

ប្រព័ន្ធចរាចរណ៍ផ្លូវអាកាសរបស់ប្រទេស បានធ្លាក់ចូលទៅក្នុងភាពវឹកវរកាលពីខែសីហា ឆ្នាំ២០២៣ នៅពេលដែលបញ្ហាបច្ចេកទេស បានរំខានដល់សេវាកម្មចរាចរណ៍ផ្លូវអាកាសជាតិអស់រយៈពេលជាច្រើនម៉ោង។