ប្រធានាធិបតីចិន លោក ស៊ី ជីនពីង (Xi Jinping) បានទៅដល់ប្រទេសស៊ែរប៊ី កាលពីល្ងាចថ្ងៃអង្គារ (០៧ ឧសភា) ដោយអមដំណើរដោយយន្តហោះ MIG-29 ក្នុងដំណើរទស្សនកិច្ចដែលមានការពិនិត្យសុវត្ថិភាពយ៉ាងតឹងរ៉ឹង ស្របពេលជាមួយខួបលើកទី២៥ នៃការទម្លាក់គ្រាប់បែករបស់អង្គការណាតូ លើស្ថានទូតចិន ដែលក្នុងនោះអ្នកសារព័ត៌មានចិន ៣ នាក់ត្រូវបានសម្លាប់។
បន្ទាប់ពីប្រទេសបារាំង ទីក្រុងបែលក្រាដ គឺជាកន្លែងឈប់សំចតទីពីរក្នុងដំណើរទស្សនកិច្ចលើកដំបូងរបស់លោក ស៊ី ទៅកាន់អឺរ៉ុប ក្នុងរយៈពេលប្រាំឆ្នាំ ដែលរួមមានប្រទេសហុងគ្រីផងដែរ។ នៅក្នុងប្រទេសស៊ែរប៊ី ដែលត្រូវបានគេមើលឃើញថាជាដៃគូដ៏សំខាន់បំផុតរបស់ចិននៅក្នុងតំបន់បាល់កង់ លោក ស៊ី ត្រូវបានគេរំពឹងថានឹងពិភាក្សាអំពីការវិនិយោគរាប់ពាន់លានដុល្លាររបស់ចិននៅក្នុងប្រទេសនេះ និងកិច្ចព្រមព្រៀងថ្មីៗដែលអាចកើតមាន។
ប្រធានាធិបតីស៊ែរប៊ី លោក អាឡិកសានដារ វូស៊ីក (Aleksandar Vucic) និងក្រុមមន្ត្រីរដ្ឋាភិបាលបានទទួលស្វាគមន៍លោក ស៊ី នៅអាកាសយានដ្ឋានបែលក្រាដ ជាទីដែលលោកត្រូវបានស្វាគមន៍ដោយទាហានកងឆ្មាំអង្គរក្សកិត្តិយស និងអ្នករាំរបាំប្រជាប្រិយ។ មេដឹកនាំទាំងពីរនឹងបើកកិច្ចប្រជុំមួយនៅថ្ងៃពុធ (០៨ ឧសភា) នេះ។
លោក ស៊ី កំពុងបំពេញទស្សនកិច្ចនៅប្រទេសស៊ែរប៊ី បន្ទាប់ពីប្រទេសបារាំង ជាទីដែលលោកប្រធានាធិបតី អ៊ីម៉ានុយអែល ម៉ាក្រុង (Emmanuel Macron) និងប្រធានគណៈកម្មការសហភាពអឺរ៉ុប លោកស្រី អឺស៊ូឡា វ៉ុនដើលេយ៉េន (Ursula von der Leyen) បានជំរុញលោកឱ្យធានានូវតុល្យភាពពាណិជ្ជកម្មជាមួយអឺរ៉ុប និងប្រើប្រាស់ឥទ្ធិពលរបស់លោកលើប្រទេសរុស្ស៊ី ដើម្បីបញ្ចប់សង្រ្គាមនៅអ៊ុយក្រែន៕