ប្រព័ន្ធផ្សព្វផ្សាយផ្លូវការរបស់កូរ៉េខាងជើង បាននិយាយនៅថ្ងៃពុធ (០៨ ឧសភា) នេះថា លោក គីម គីណាម (Kim Ki Nam) ដែលជាមន្ត្រីកូរ៉េខាងជើងកាន់តំណែងយូរជាងគេបំផុតមួយរូប និងដែលបានបម្រើមេដឹកនាំទាំងបីជំនាន់របស់ខ្លួនជួយពង្រឹងភាពស្របច្បាប់ខាងនយោបាយរបស់ពួកគេ និងជាអ្នកដឹកនាំផ្នែកឃោសនាសម្រាប់រដ្ឋរាជវង្សមួយនេះ បានទទួលមរណភាពនៅវ័យ ៩៤ ឆ្នាំ។

មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានទៅគោរពសពលោក គីម គីណាម នៅម៉ោង ២ ទៀបភ្លឺនៅថ្ងៃពុធនេះ «ដោយទុក្ខសោកដ៏ជូរចត់ចំពោះការបាត់បង់អ្នកនយោបាយបដិវត្តន៍ជើងចាស់ម្នាក់ ដែលនៅតែស្មោះត្រង់គ្មានព្រំដែន» ចំពោះប្រទេសរហូតដល់ទីបញ្ចប់។

ទីភ្នាក់ងារសារព័ត៌មានផ្លូវការ KCNA បាននិយាយថា លោក គីម គីណាម បានទទួលមរណភាពកាលពីថ្ងៃអង្គារ ក្នុងវ័យ ៩៤ ឆ្នាំ។ លោកគឺជាផ្នែកមួយនៃក្រុមមន្ត្រីស្នូលដ៏ស្មោះត្រង់ដែលបានបម្រើការដើម្បីទ្រទ្រង់ដល់ជំនាន់ទាំងបីរបស់មេដឹកនាំត្រកូល គីម ដោយភាពស្មោះត្រង់ជាមួយមេដឹកនាំបដិវត្តន៍ដែលបានបង្កើតរដ្ឋនៅក្នុងឆ្នាំ១៩៤៥។

លោក គីម គីណាម គឺជាមន្ត្រីកូរ៉េខាងជើងមួយរូបក្នុងចំណោមមន្ត្រីកូរ៉េខាងជើងតិចតួចបំផុតដែលបានទៅបំពេញទស្សនកិច្ចនៅកូរ៉េខាងត្បូង ដោយដឹកនាំគណៈប្រតិភូពិធីបុណ្យសពក្នុងឆ្នាំ២០០៩ បន្ទាប់ពីការស្លាប់របស់អតីតប្រធានាធិបតីកូរ៉េខាងត្បូង លោក គីម ដេជុង (Kim Dae-jung) ដែលបានបើកសម័យកាលនៃការផ្សះផ្សាជាមួយទីក្រុងព្យុងយ៉ាង ជាមួយនឹង «គោលនយោបាយពន្លឺព្រះអាទិត្យ» របស់ខ្លួននៅពេលនោះ៕