អង្គការមូលនិធិបង្ការរបួសអាស៊ី (AIP) នៅព្រឹកថ្ងៃទី៨ ខែឧសភា ឆ្នាំ២០២៤នេះ បានរៀបចំសិក្ខាសាលាបណ្តុះបណ្តាលជនបង្គោលស្តីពី “បច្ចេកទេសក្នុងការបើកបរទោចក្រយានយន្ត (ម៉ូតូ) ដោយសុវត្ថិភាព” ដោយអញ្ជើញតំណាងរោងចក្រ សហគ្រាសចំនួន៦ មកពីរាជធានី ខេត្តចំនួន៥ ដើម្បីអនុវត្តការបង្រៀនបន្តដល់ក្រុមគោលដៅប្រកបដោយប្រសិទ្ធភាព។
សិក្ខាសាលានេះប្រព្រឹត្តទៅក្រោមវត្តមានរបស់ឯកឧត្តមឧត្តមសេនីយ៍ឯក គាំ សារឿន អនុប្រធាននាយកដ្ឋានកណ្តាលសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិក្រសួងមហាផ្ទៃ ដោយទទួលបានការគាំទ្រពីក្រុមហ៊ុនសាជីវកម្ម វីអេហ្វ និងប្រារព្ធក្រោមកិច្ចសហការយ៉ាងជិតស្និតជាមួយស្ថាប័នរាជរដ្ឋាភិបាល ជាពិសេសក្រសួងសាធារណការ និងដឹកជញ្ជូន អគ្គស្នងការដ្ឋាននគរបាលជាតិ និងរោងចក្រដៃគូមកពីរាជធានីភ្នំពេញ ខេត្តកណ្តាល កំពង់ស្ពឺ តាកែវ និងខេត្តកំពង់ចាម។ សិក្ខាសាលានេះរៀបចំឡើងក្នុងគោលបំណងផ្តល់ចំណេះដឹងអំពីការបើកបរទោចក្រយានយន្តដោយសុវត្ថិភាព ជំនាញការបើកបរ និងវិធីសាស្ត្រក្នុងការចែករំលែក និងបង្រៀនបន្ត និងបង្កើនការយល់ដឹង អាកប្បកិរិយា និងឥរិយាបថ ក្នុងការបើកបរប្រកបដោយការទទួលខុសត្រូវ។
នាឱកាសនេះ ឯកឧត្តម គាំ សារឿន បានមានប្រសាសន៍ថា ជាការកត់សម្គាល់ ការគ្រោះថ្នាក់ចរាចរណ៍ភាគច្រើន គឺក្នុងចំណោមអ្នកជិះម៉ូតូនៅតែមានអត្រាគ្រោះថ្នាក់ខ្ពស់។ ជាក់ស្តែងយោងតាមរបាយការណ៍ គិតក្នុងឆ្នាំ២០២៣ គ្រោះថ្នាក់កើតឡើងសរុប ៣,៣១៧លើក បណ្តាលឲ្យស្លាប់ជាង១,៥០០នាក់ និងរបួសជាង ៤,៥០០នាក់។ ឯកឧត្តម បានបន្តថា មូលហេតុបង្កគ្រោះថ្នាក់នេះ រួមមាន បើកបរល្មើសល្បឿន ៤១% មិនគោរពសិទ្ធិ២២% មិនប្រកាន់ស្តាំ៩% បត់៩% ប្រជែងគ្រោះថ្នាក់៧% កត្តាយានយន្ត៥% ស្រវឹង៣% ភ្លើងសញ្ញា១% សុខភាព/ងងុយ១% និងកត្តាអាកាសធាតុ១%។
ឯកឧត្តម គាំ សារឿន បានបញ្ជាក់បន្ថែមថា ក្នុងចំណោមអ្នកស្លាប់ជាអ្នកជិះម៉ូតូចំនួន៨០% ស្មើនឹងប្រមាណជាង ១,៥០០នាក់ ក្នុងនោះមិនពាក់មួកសុវត្ថិភាពចំនួន៦៩%។ គ្រោះថ្នាក់បានកើតឡើងច្រើននៅរាជធានីភ្នំពេញ៩៥០លើក ខេត្តព្រះសីហនុ ៣០៦លើក និងខេត្តតាកែវ ២៧០លើក។
តាមរយៈសិក្ខាសាលាបណ្តុះបណ្តាលនេះ អង្គការមូលនិធិបង្ការរបួសអាស៊ី ជឿជាក់ថា គ្រូបង្គោលទាំងអស់ នឹងទទួលបានចំណេះដឹងអំពីការបើកបរម៉ូតូដោយសុវត្ថិភាព ជំនាញការបើកបរ និងវិធីសាស្ត្រក្នុងការចែករំលែក និងបង្រៀនបន្តដល់កម្មករ និយោជិត ព្រមទាំងបង្កើនការយល់ដឹង និងឥរិយាបថក្នុងការបើកបរប្រកបដោយការទទួលខុសត្រូវ។
សូមជម្រាបជូនទៀតថា ជារៀងរាល់ថ្ងៃប្រជាជនកម្ពុជាជាច្រើនលាននាក់ តែងធ្វើដំណើរទៅមកនៅលើដងផ្លូវដែលមានចរាចរណ៍យ៉ាងមមាញឹក។ ក្នុងនោះក៏មានកម្មករនិយោជិតក្នុងវិស័យកាត់ដេរសម្លៀកបំពាក់ និងផលិតស្បែកជើងប្រមាណជិត ៤០ម៉ឺននាក់ ដែលបាននិងកំពុងប្រថុយគ្រោះថ្នាក់នៅលើដងផ្លូវពេលធ្វើដំណើរទៅមកបំពេញការងារជារៀងរាល់ថ្ងៃដោយការធ្វើដំណើរតាមម៉ូតូ។ បញ្ហានេះ ពិតជាកង្វល់ដ៍ធំបំផុតក្នុងការដោះស្រាយ ជាពិសេសចំពោះស្ថាប័នរាជរដ្ឋាភិបាល និងអ្នកពាក់ព័ន្ធទាំងអស់៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
