អនុប្រធាននៃអាជ្ញាធរការពារជាតិតៃវ៉ាន់ បាននិយាយនៅថ្ងៃពុធ (០៨ ឧសភា) នេះថា យោធារបស់កោះតៃវ៉ាន់ បានត្រៀមខ្លួនរួចជាស្រេចសម្រាប់សកម្មភាពណាមួយដែលចិន អាចធ្វើនៅជុំវិញពេលដែលមេដឹកនាំជាប់ឆ្នោតថ្មី លោក ឡៃ ឈីងទឺ (Lai Ching-te) ចូលកាន់តំណែងនៅចុងខែនេះ។

ប្រទេសចិន ដែលចាត់ទុកកោះតៃវ៉ាន់ថាជាទឹកដីរបស់ខ្លួន មានការមិនពេញចិត្តយ៉ាងខ្លាំងចំពោះលោក ឡៃ ដោយជឿជាក់ថាលោកជាអ្នកផ្ដាច់ខ្លួនដ៏គ្រោះថ្នាក់។ រដ្ឋាភិបាលចិន បានច្រានចោលសំណើម្តងហើយម្តងទៀតនៃការចរចារបស់លោក ឡៃ រួមទាំងសំណើកិច្ចពិភាក្សាមួយដែលបានលើកឡើងកាលពីខែមុន។

លោក ឡៃ ដូចនឹងមេដឹកនាំបច្ចុប្បន្ន លោកស្រី សៃ អ៊ីងវិន (Tsai Ing-wen) ដែរគឺបដិសេធការទាមទារអធិបតេយ្យភាពរបស់ទីក្រុងប៉េកាំង។ អ្នកទាំងពីរនិយាយថាមានតែប្រជាជនកោះនេះទេដែលអាចសម្រេចអនាគតរបស់ពួកគេបាន។ លោក ឡៃ ដែលបច្ចុប្បន្នជាមេដឹកនាំលំដាប់ទី២ នឹងត្រូវចូលកាន់តំណែងនៅថ្ងៃទី២០ ខែឧសភា ខាងមុខនេះ។

យោធារបស់ចិន ក្នុងអំឡុងពេលបួនឆ្នាំកន្លងមកនេះ បានបង្កើនសកម្មភាពរបស់ខ្លួនយ៉ាងច្រើនជុំវិញកោះតៃវ៉ាន់ ដូចជាការហោះហើរយន្តហោះចម្បាំងជាប្រចាំនៅលើខ្សែបន្ទាត់មេដ្យាននៃច្រកសមុទ្រតៃវ៉ាន់ ដែលពីមុនជាតំបន់ទ្រនាប់មិនផ្លូវការរវាងភាគីទាំងពីរ។

ប្រទេសចិន ដែលអាជ្ញាធរការពារជាតិតៃវ៉ាន់ និយាយថាបានរៀបចំ «ការល្បាតត្រៀមប្រយុទ្ធរួមគ្នា» យ៉ាងហោចណាស់ចំនួនពីរដងនៅជិតកោះនេះក្នុងខែមុននេះ បាននិយាយថា ខ្លួនមិនទទួលស្គាល់អត្ថិភាពនៃខ្សែបន្ទាត់មេដ្យាននេះទេ៕