នៅក្នុងតំបន់ព្រៃនៃតំបន់ភ្នំ ដាវណា ហ៊ីលស៍ (Dawna Hills) ភាគអាគ្នេយ៍នៃសហភាពមីយ៉ាន់ម៉ា ក្រុមឧទ្ទាមមកពីក្រុមជនជាតិភាគតិចប្រដាប់អាវុធមួយក្រុមកំពុងប្រយុទ្ធទប់ទល់នឹងជួរកងទ័ព ដែលបញ្ជូនដោយរបបសឹកកំពុងកាន់អំណាចរបស់ប្រទេស ដើម្បីព្យាយាមដណ្តើមយកភូមិ មីយ៉ាវ៉ាឌី (Myawaddy) ដែលជាច្រកពាណិជ្ជកម្មដ៏សំខាន់មួយនៅព្រំដែនថៃ។

របបយោធា និងក្រុមតស៊ូ កំពុងប្រជែងយ៉ាងស្វិតស្វាញដើម្បីដណ្ដើមទឹកដីប្រយុទ្ធសំខាន់ៗ ឬរក្សាទីតាំងសឹករបស់ពួកគេ ខណៈរដូវខ្យល់មូសុងមានភ្លៀងធ្លាក់ដែលបង្កការលំបាកសម្រាប់ការប្រយុទ្ធ កំពុងចាប់ផ្តើមនៅប្រទេសមីយ៉ាន់ម៉ានៅដើមខែមិថុនា ខាងមុខនេះ។ ក្រុមអ្នកវិភាគនិយាយថា អាកាសធាតុបែបនេះ បង្អាក់ការវាយលុករបស់យោធាដែលឈរជើងនៅសមរភូមិជួរមុខជាច្រើន។

អ្វីដែលកើតឡើងនៅប៉ុន្មានសប្តាហ៍ខាងមុខក្នុងការដណ្តើមយកភូមិ មីយ៉ាវ៉ាឌី និងទីតាំងយុទ្ធសាស្ត្រផ្សេងទៀតក្នុងប្រទេសមីយ៉ាន់ម៉ា អាចកំណត់ដំណាក់កាលបន្ទាប់នៃជម្លោះដ៏បង្ហូរឈាមដែលបានអូសបន្លាយជាងបីឆ្នាំ ហើយអាចកំណត់ជោគវាសនារបស់របបសឹក។

មន្ត្រីថៃម្នាក់ និងប្រភពការទូតបានប្រាប់សារព័ត៌មានរ៉យទ័រ ដោយផ្អែកលើការវាយតម្លៃ និងស្ថានភាពប្រយុទ្ធដែលកំពុងបន្តថា យោធាអាចបាត់បង់ការគ្រប់គ្រងលើព្រំដែនសំខាន់ៗទាំងអស់ជាមួយបង់ក្លាដែស ចិន ឥណ្ឌា និងថៃ ក្នុងរយៈពេលប្រាំមួយខែខាងមុខនេះ ដែលជាតំបន់ប្រយុទ្ធដ៏សំខាន់ជាមួយក្រុមឧទ្ទាមចម្រុះ៕