បណ្តាសាលារៀននៅខេត្តកណ្តាល នៅថ្ងៃទី៨ ខែឧសភានេះ បានចាប់ផ្តើមអនុវត្តម៉ោងរៀន និង​បង្រៀន​តាម​កាល​វិភាគដូចធម្មតាឡើងវិញ ក្រោយពីបានទទួលសេច​ក្តី​ជូនដំណឹង​របស់​ក្រសួង​អប់រំ យុវជន និងកីឡា នៅថ្ងៃទី៧ ខែឧសភា ម្សិលមិញនេះឲ្យអនុវត្តម៉ោងសិក្សាធម្មតាវិញ ខណៈទូ​ទាំង​ប្រទេសអាកាសធាតុមានសីតុណ្ហភាពត្រឡប់ត្រឹម ២៥ ទៅ៣៧ អង្សាវិញ។

បណ្តាសាលារៀនមានកម្រិតបឋមសិក្សា ដល់វិទ្យាល័យ នៅទូទាំងខេត្តកណ្តាល នៅថ្ងៃនេះ បាន​ចាប់​ផ្តើម​អនុវត្តម៉ោងរៀន និងបង្រៀនទៅតាមកាលវិភាគដូចធម្មតាវិញ ពោលគឺវេនពេល​ព្រឹក​សិស្សា​នុសិស្សចា​ប់ចូលរៀន នៅម៉ោង ៧ និងចេញពីរៀនវិញនៅម៉ោង ១១។ ដោយឡែក​វេ​ន​រៀន​ពេល​​ថ្ងៃ គឺចាប់ចូលរៀននៅម៉ោង ១ និងចេញពីនៅម៉ោង៥ល្ងាចជាធម្មតាវិញ ក្រោយ​ពី​កម្តៅ​សីតុណ្ហភាព​កម្ដៅ​ថ្ងៃបានធ្លាក់ចុះវិញ។

អំឡុងទូទាំងប្រទេសមានមានកម្តៅអាកាសធាតុឡើងដល់ ៤០ និង៤១អង្សា ក្រសួង​អប់រំ​បាន​សម្រេច​ជូន​ដំណឹងគ្រឹះស្ថានសិក្សានានាអនុវត្តសិទ្ធសម្រេចជាក់ស្តែង ធ្វើការផ្លាស់ប្តូរម៉ោងរៀន និង​បង្រៀន ដែលបញ្ហានេះធ្វើឲ្យបណ្តាសិស្សានុសិស្សថ្នាក់ទី១២ ដែលកំពុងខំប្រឹងរៀន ដើម្បីត្រៀម​ប្រឡងបាក់ឌុប មានការព្រួយបារម្ភខ្លះៗដែរ អំពី​បញ្ហា​អាកាស​ធាតុ​ឡើង​កម្តៅ​នេះ​ធ្វើ​ឲ្យ​ប៉ះពាល់​ម៉ោងសិក្សា និងសុខភាពការសិក្សារបស់គេ ហើយនៅពេលនេះ សិស្សទាំងអស់​គ្នា​មាន​សប្បាយ​ចិត្ត​ដែលកម្តៅអាកាសធាតុធ្លាក់មករកភាពធម្មតាវិញបានលឿន។

លោក ចេង សំអ៊ុល ប្រធានមន្ទីរអប់រំយុវជន និងកីឡាខេត្តកណ្តាល ថ្លែងថា មកដល់ពេលនេះ មន្ទីរ​អប់រំ បានផ្សព្វផ្សាយជូនដំណឹងទៅដល់ការិយាល័យអប់រំក្រុងស្រុក គ្រឹះស្ថាន​សិក្សា​អស់​ហើយ ហើយបណ្តាសាលារៀនទាំងអស់ ក៏បាននាំគ្នាអនុវត្តសេចក្តីណែនាំ ចេញនៅថ្ងៃទី៧ ខែ​ឧសភា​ម្សិលមិញ ឲ្យម៉ោងរៀន និងបង្រៀន តាមកាលវិភាគធម្មតាវិញ ក្រោយកម្តៅ​ថ្ងៃ​ធ្លាក់​មក​រក​ភាព​ធម្មតា​វិញ៕ អត្ថបទ ស៊ុម សុខជា