ការងារអង្កេតចន្លោះជំរឿនប្រជាជនជាការងារចាំបាច់មួយ ដែលក្រសួងផែនការ​តែង​ចុះប្រមូល​ទិន្នន័យ​រៀងរាល់​ចន្លោះជំរឿនប្រជាជន។ ជាក់ស្ដែងកំឡុងខែ ឧសភានេះ ក្រុមការងារ​ជំនាញ​នៃ​ក្រសួង​ផែនការ បាននឹងកំពុងបន្តចុះប្រមូលទិន្នន័យ ពីគ្រួសារគោលដៅ ដែល​ត្រូវ​បាន​ជ្រើស​រើស​នៅ​តាម​មណ្ឌល​ជំរឿននីមួយៗ។

ការងារប្រមូលទិន្នន័យចន្លោះជំរឿនប្រជាជនឆ្នាំ ២០២៤ បានចាប់ផ្ដើមនៅថ្ងៃទី ៣ខែ ឧសភា ឆ្នាំ ២០២៤នេះ។ ការប្រមូលទិន្នន័យនេះ នឹងបន្តរហូតដល់ថ្ងៃទី ២០ ខែឧសភា។ ការងារ​ប្រមូល​ទិន្នន័យ​អង្កេត​ចន្លោះជំរឿនប្រជាជននេះ គឺខុសពីការប្រមូលទិន្នន័យជំរឿនប្រជាជន។ ការ​ប្រមូល​​​ទិន្នន័យចន្លោះជំរឿនប្រជាជន គឺសម្ភាសន៍​ទៅ​លើ​គ្រួសារ​គោលដៅ​ដែ​ល​ជា​សំណាក​មួយ​ចំនួន​ប៉ុណ្ណោះ។

សម្រាប់​ការងារ​អង្កេតចន្លោះជំរឿនប្រជាជននេះ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានលើកឡើងកាលពីថ្ងៃទី ១៩ ខែមេសា កន្លងទៅថា ទិន្នន័យ និងព័ត៌មានស្ថិតិ នៃអង្កេត​ចន្លោះ​ជំរឿន​ប្រជាជនឆ្នាំ២០២៤នេះ គឺជាធាតុចូល និងភស្តុតាងដ៏សំខាន់ ដែលអ្នកធ្វើ​គោល​នយោបាយ​ត្រូវការជាចាំបាច់សម្រាប់ការរៀបចំគោលនយោបាយយុទ្ធសាស្ត្រ និង​ផែនការ​អភិវឌ្ឍ​សង្គម-សេដ្ឋកិច្ចប្រជាសាស្ត្រឱ្យចំគោលដៅ សម្រាប់រយៈពេលខ្លីមធ្យម និងវែង។ អង្កេត​ចន្លោះ​ជំរឿន​ប្រជាជន​នៅ​ព្រះរាជាណាចក្រកម្ពុជាឆ្នាំ២០២៤ គឺជាអង្កេតលើកទីបី ដែលកម្ពុជា បាន​រៀប​ចំ​ឡើង​។ អង្កេតចន្លោះប្រជាជនលើកទីមួយនៅឆ្នាំ ២០០៤ ដែលធ្វើឡើង​ក្នុង​ចន្លោះ​ជំរឿន​ប្រជាជន​ទូទៅ​ឆ្នាំ១៩៩៨ និងជំរឿនប្រជាជនទូទៅឆ្នាំ២០០៨។ អង្កេតចន្លោះប្រជាជន លើកទី​ពីរ​នៅ​ឆ្នាំ២០១៣ ក្នុងចន្លោះជំរឿនប្រជាជនទូទៅឆ្នាំ២០០៨ និងជំរឿនប្រជាជនទូទៅឆ្នាំ២០១៩។

អង្កេតចន្លោះជំរឿនប្រជាជននៅព្រះរាជាណាចក្រកម្ពុជា ឆ្នាំ២០២៤ គឺជាការប្រមូលព័ត៌មាន ទាក់​ទង​នឹងប្រជាជន សុខភាព និងបញ្ហាសង្គមដូចជារចនាសម្ព័នអាយុ ភេទរបស់ប្រជាជន ជាតិ​ពន្ធុ (ភាសាកំណើត) សាសនា ពិការភាព ស្ថានភាពអប់រំ មុខវិជ្ជាជំនាញដែលទទួលបាន ស្ថានភាព​ការងារ វិស័យការងារ ផ្នែកការងារ និងសេដ្ឋកិច្ច សង្គមកិច្ច ភាពមានឬគ្មានការងារធ្វើ អសកម្មជនសេដ្ឋកិច្ច មរណភាពទារក មរណភាពកុមារ មរណភាពមាតា។ លើស​ពី​នេះ​ក៏​ផ្តោត​លើ អាយុសង្ឃឹមរស់ ស្ថានភាពអាពាហ៍ពិពាហ៍ កម្រិតលទ្ធភាពមានកូន ចំណាក​ស្រុក​ក្នុង​និង​ក្រៅ​ប្រទេស ចរឹតលក្ខណៈផ្ទះសម្បែង និងបរិស្ថាន ដូចជាគោលដៅក្នុងការប្រើប្រាស់អគារ/សំណង់ ការ​កាន់​កាប់លំនៅដ្ឋាន ប្រភពបំភ្លឺចម្បង ប្រភពថាមពលប្រើប្រាស់សម្រាប់ចំអិនអាហារ ទឹកស្អាត គ្រប់​គ្រង​បង្គន់អនាម័យ ការទុកដាក់ កាកសំណល់លាមក ការប្រើប្រាស់គណនីធនាគារ ការ​ប្រើប្រាស់​ថ្នាំ​ជក់ ការប្រើប្រាស់អ៊ុនធើណែត ការវាយតម្លៃ ចំណេះដឹង ឥរិយាបទ ការអនុវត្ត និង​កត្តា​ហានិភ័​យសម្រាប់ជំងឺមិនឆ្លង និងរបួស និងទ្រព្យសម្បត្តិដែលគ្រួសារមាន សម្រាប់វិភាគ​ពហុ​សមាសធាតុ​ក្រីក្រក្នុ​ងចំណោមប្រជាជនកម្ពុជា៕ អត្ថបទ៖ គឹមហុក