លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៅថ្ងៃទី៧ ឧសភា ឆ្នាំ២០២៤ បាន​ជួប​ពិភាក្សា​​ការងារ​ជាមួយ លោកបណ្ឌិត Ratnakar Adhikari នាយកប្រតិបត្តិ លេខាធិការដ្ឋាន​កម្ម​វិធី​ពង្រឹង​ក្រប​ខណ្ឌសមាហរណកម្ម (Enhanced Integrated Framework-EIF) នៃអង្គការ​ពាណិជ្ជ​កម្ម​ពិភពលោក (WTO) និងលោក Aik Hoe Lim នាយកផ្នែកពាណិជ្ជកម្ម និងបរិស្ថាន​ នៃ​អង្គការ WTO នៅទីស្នាក់ការអង្គការ WTO ប្រចាំទីក្រុងហ្សឺណែវ សហព័ន្ធស្វីស។

យោងតាមក្រសួងពាណិជ្ជកម្មកម្ពុជា នៅព្រឹកថ្ងៃទី៨ ខែឧសភានេះ បានឲ្យដឹងថា ក្នុងជំនួបនេះ បាន​លើកឡើងពីសមិទ្ធិផលសំខាន់ៗរបស់កម្មវិធីពង្រឹងក្របខណ្ឌសមាហរណកម្ម និងការ​គាំទ្រ​នា​ពេល​បច្ចុប្បន្ន ដើម្បីបង្កើតក្របខ័ណ្ឌគោលនយោបាយពាណិជ្ជកម្មកម្ពុជាឆ្ពោះទៅឆ្នាំ២០៣០ ដែល​ក្រសួងពាណិជ្ជកម្ម បាននិងកំពុង​ដឹកនាំ​ក្នុង​ការ​រៀបចំ​ក្រប​ខ័ណ្ឌ​គោល​នយោបាយ​ពាណិជ្ជក​ម្ម​សម្រាប់​កម្ពុជា ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា និង​សម្រាប់ការចាកចេញពីក្រុមប្រទេសអភិវឌ្ឍន៍តិចតួចនាពេលខាងមុខ។

បន្ថែមពីនេះ លោកជំទាវរដ្ឋមន្ត្រី ក៏បានលើកឡើងផងដែរថា បច្ចុប្បន្ននេះ ក្រសួងពាណិជ្ជកម្ម បាន​និងកំពុងរៀបចំបង្កើតគណៈកម្មាធិការជំនួយពាណិជ្ជកម្ម សម្រាប់​ការ​សម្រប​សម្រួល​កាន់​តែ​ប្រសើរ​ជាមួយម្ចាស់ជំនួយ និងដៃគូអភិវឌ្ឍន៍ ដើម្បីប្រើប្រាស់ធន​ធាន​ សម្រាប់​ការ​អនុវត្ត​ក្រប​ខ័ណ្ឌ​គោល​នយោបាយពាណិជ្ជកម្មកម្ពុជាក្នុងគោលបំណងអភិវឌ្ឍន៍ពាណិជ្ជកម្ម។

ជាកិច្ចឆ្លើយតប លោកបណ្ឌិត Adhikari បានស្វាគមន៍គណៈប្រតិភូកម្ពុជា និងបានកោត​សរសើរ​ដល់​កម្ពុជា ក្នុងការអនុវត្តគម្រោងកម្មវិធីពង្រឹងក្របខណ្ឌសមាហរណកម្ម ប្រកប​ដោយ​ប្រសិទ្ធភាព។ លោកក៏បានលើកឡើងអំពីការគាំទ្រកម្មវិធីពង្រឹងក្របខណ្ឌសមាហរណកម្ម លើការបង្កើតក្របខណ្ឌគោលនយោបាយពាណិជ្ជកម្មកម្ពុជាផងដែរ។ ក្នុងឱកាសនោះលោក Lim នាយក​ផ្នែកពាណិជ្ជកម្មនិងបរិស្ថាននៃ WTO បានជម្រាបផងដែរថា លេខាធិការដ្ឋាន WTO និង​ធនាគារ​អភិវឌ្ឍន៍អាស៊ី (ADB) បានចុះហត្ថលេខាលើឯកសារអនុស្សរណៈនៃការយោគយល់គ្នា (MoU) មួយដើម្បីជំរុញការអភិវឌ្ឍន៍ប្រកបដោយបរិយាប័ន្ន និងនិរន្តរភាព តាមរយៈ​សមាហរណ​កម្ម​ពាណិជ្ជ​កម្ម និងសេដ្ឋកិច្ចនៅក្នុងតំបន់អាស៊ី-ប៉ាស៊ីហ្វិក និងបានត្រៀម​ខ្លួន​ជា​ស្រេច​សម្រាប់​កិច្ច​សហប្រតិបត្តិការនានា៕ អត្ថបទ៖ ឈិត បូរ៉ាវី