តារាភាពយន្តអាសអាភាស នាង ស្តមមី ដានីញែលស៍ (Stormy Daniels) បានរៀបរាប់ពីទំនាក់ទំនងផ្លូវភេទកាលពីឆ្នាំ២០០៦ របស់នាងជាមួយលោក ដូណាល់ ត្រាំ (Donald Trump) ក្នុងន័យមិនសមរម្យនៅក្នុងការកាត់ក្តីព្រហ្មទណ្ឌរបស់លោក ត្រាំ កាលពីថ្ងៃអង្គារ (០៧ ឧសភា) ដោយផ្ដល់សក្ខីកម្មថានាងព្យាយាមមិនគិតអំពីការរួមភេទនោះ ហើយខ្លាចថារឿងនេះនឹងត្រូវលាតត្រដាងជាសាធារណៈ។

អស់រយៈពេលជាច្រើនម៉ោង នាង ដានីញែលស៍ វ័យ ៤៥ ឆ្នាំបានផ្តល់ព័ត៌មានលម្អិតក្នុងនាមជាសាក្សីអំពីទំនាក់ទំនងផ្លូវភេទជាមួយលោក ត្រាំ វ័យ ៧៧ ឆ្នាំ និងកិច្ចព្រមព្រៀងជាទឹកប្រាក់ដើម្បីរក្សាភាពស្ងៀមស្ងាត់ចំពោះរឿងនេះនៅមុនការបោះឆ្នោតឆ្នាំ២០១៦ នៅពេលដែលលោកបានឈ្នះតំណែងសេតវិមាន។

នាងបានប្រាប់គណៈវិនិច្ឆ័យថា ជីវិតរបស់នាងបានធ្លាក់ចូលទៅក្នុង «ភាពវឹកវរ» បន្ទាប់ពីកិច្ចព្រមព្រៀងនេះត្រូវបានផ្សព្វផ្សាយជាសាធារណៈនៅក្នុងឆ្នាំ២០១៨ ដោយនិយាយថាខ្លួនត្រូវបានគេមាក់ងាយ និងយាយី។ សក្ខីកម្មរបស់នាង ដានីញែលស៍ បានផ្តល់ឱកាសសម្រាប់មេធាវីរបស់លោក ត្រាំ ក្នុងការស្នើឱ្យតុលាការបញ្ចប់សំណុំរឿងនេះ ដោយលើកហេតុផលថាព័ត៌មានលម្អិតមិនសមរម្យដូចជាការផ្ដល់សក្ខីកម្មរបស់នាងដែលថាលោក ត្រាំ មិនបានប្រើស្រោមអនាម័យក្នុងពេលរួមភេទ មានគោលបំណងធ្វើឱ្យប៉ះពាល់ដល់គណៈវិនិច្ឆ័យ។

ចៅក្រម វ័ន មើឆាន (Juan Merchan) បានបដិសេធសំណើនោះ ប៉ុន្តែបានយល់ព្រមថា សក្ខីកម្មមួយចំនួនរបស់នាងពិតជាហួសហេតុខ្លាំងពេក។ មេធាវីរបស់លោក ត្រាំ បានវាយប្រហារលើភាពជឿជាក់របស់នាង ដានីញែលស៍ ហើយបានចំអកអំពីសក្ខីកម្មមិនត្រូវគ្នា ដែលនាងបានធ្វើក្នុងរយៈពេលជាច្រើនឆ្នាំអំពីទំនាក់ទំនងជាមួយលោក ត្រាំ។

នាង ដានីញែលស៍ បានសារភាពថាខ្លួន «ស្អប់» លោក ត្រាំ និងចង់រកលុយពីរឿងនេះ ហើយការពន្យល់អំពីមូលហេតុដែលនាងលាតត្រដាងជាសាធារណៈ បន្ទាប់ពីស្ងប់ស្ងាត់រយៈពេលប្រាំពីរឆ្នាំជុំវិញបញ្ហានេះក៏មិនច្បាស់លាស់ដែរ៕