គណៈកម្មាធិការរៀបចំការបោះឆ្នោតរបស់ប្រទេសឥណ្ឌា បានបញ្ជាទៅវេទិកាបណ្ដាញសង្គម X កាលពីថ្ងៃអង្គារ (ទី៧ ខែឧសភា) ឲ្យលុបចោលនូវការបង្ហោះវីដេអូដោយគណបក្សរបស់នាយករដ្ឋមន្ត្រីលោក Narendra Modi បន្ទាប់ពីមានការតវ៉ាពីក្រុមប្រឆាំងថា វីដេអូនោះបានជំរុញឲ្យមានភាពជាសត្រូវនឹងគ្នា ក្នុងចំណោមក្រុមដែលខ្សោយខាងផ្នែកសេដ្ឋកិច្ច។
បទបញ្ជាឲ្យដកចេញ ដោយសារបំពានច្បាប់បោះឆ្នោតនេះ បានកើតឡើងប៉ុន្មានថ្ងៃ បន្ទាប់ពីនគរបាលបានប្ដឹងប្រឆាំងនឹងមេដឹកនាំគណបក្សជាតិនិយមហិណ្ឌូដែលកំពុងកាន់អំណាច គឺគណបក្ស Bharatiya Janata (BJP) រួមទាំងប្រធានអង្គភាពនៅរដ្ឋ Karnataka ដែលបានចូលរួមបង្ហោះបន្តនូវវីដេអូនេះ។
គួបញ្ជាក់ថា វីដេអូគំនូរជីវចលដែលបានចេញផ្សាយកាលពីសប្តាហ៍មុន អំឡុងការបោះឆ្នោតសកលរយៈពេលយូររបស់ប្រទេសឥណ្ឌា បានចោទប្រកាន់បណ្ដាមេដឹកនាំគណបក្សប្រឆាំង Congress ថា មានផែនការពង្រីកអត្ថប្រយោជន៍សុខុមាលភាពដល់សហគមន៍មូស្លីមជនជាតិភាគតិច ដោយយកប្រៀបលើក្រុមកុលសម្ព័ន្ធ និងវណ្ណៈហិណ្ឌូដែលមានជីវភាពក្រីក្រផ្សេងទៀត។
លោក Modi ដែលកំពុងស្វែងរកអាណត្តិទី៣ បានធ្វើការចោទប្រកាន់ស្រដៀងគ្នា នៅក្នុងសុន្ទរកថានាពេលថ្មីៗនេះ ហើយបាននិយាយថា គណបក្ស Congress នឹងចែកចាយទ្រព្យសម្បត្តិរបស់ជនជាតិហិណ្ឌូភាគច្រើនទៅឲ្យអ្នកកាន់សាសនាឥស្លាម។ គណបក្ស Congress បដិសេធមិនមានការសន្យាបោះឆ្នោតបែបនេះនោះទេ។
ក្នុងលិខិតមួយផ្ញើទៅបណ្ដាញសង្គម X គណៈកម្មការរៀបចំការបោះឆ្នោតបាននិយាយថា៖ «បណ្ដាញសង្គម X ត្រូវបានបញ្ជាឲ្យដកចេញនូវការបង្ហោះនេះជាបន្ទាន់»។
យ៉ាងណាក្ដី នៅពេលនេះ មិនទាន់មានការអត្ថាធិប្បាយភ្លាមៗនោះឡើយ មិនថា ពីបណ្ដាញ X ឬគណបក្ស BJP៕