មន្ត្រីយោធា និងថាមពលរបស់អ៊ុយក្រែន នៅថ្ងៃពុធ (ទី៨ ខែឧសភា) នេះ បាននិយាយថា ការវាយប្រហារតាមអាកាសរបស់រុស្សីលើអ៊ុយក្រែន បានធ្វើឲ្យខូចខាតសម្ភារៈបរិក្ខារជាច្រើន នៅក្នុងការវាយប្រហារដែលដាក់គោលដៅលើហេដ្ឋារចនាសម្ព័ន្ធថាមពល នៅទូទាំងប្រទេស។
រដ្ឋមន្ត្រីថាមពលអ៊ុយក្រែន លោក German Galushchenko បានសរសេរនៅលើកម្មវិធីផ្ញើសារ Telegram ថា៖ «ការវាយប្រហារដ៏ធំមួយទៀតលើឧស្សាហកម្មថាមពលរបស់យើង!»។ លោកបានបន្ថែមថា រោងចក្រផលិតថាមពល និងបញ្ជូនថាមពល នៅក្នុងតំបន់ Poltava, Kirovohrad, Zaporizhzhia, Lviv, Ivano-Frankivsk និងតំបន់ Vinnytsia សុទ្ធតែត្រូវបានកំណត់គោលដៅដូចគ្នា។
លើកលែងតែតំបន់ Zaporizhzhia គ្រប់តំបន់ផ្សេងទៀតទាំងអស់ គឺនៅឆ្ងាយពីខ្សែត្រៀមមុខ ដែលឆ្លងកាត់ភាគខាងកើត និងភាគអាគ្នេយ៍របស់អ៊ុយក្រែន។ ទំហំនៃការវាយប្រហាររបស់រុស្ស៊ីលើអ៊ុយក្រែន មិនទាន់ត្រូវបានដឹងភ្លាមៗនៅឡើយទេ។ ហើយពេលនេះ ក៏មិនទាន់មានការអត្ថាធិប្បាយភ្លាមៗពីទីក្រុងមូស្គូនោះដែរ។
ដោយមិនបានផ្តល់ព័ត៌មានលម្អិតបន្ថែម ប្រតិបត្តិករបណ្តាញថាមពលជាតិអ៊ុយក្រែន Ukrenergo បានឲ្យដឹងនៅលើ Telegram ថា គ្រឿងបរិក្ខារនៅឯរោងចក្រមួយរបស់ខ្លួន ភាគកណ្តាលអ៊ុយក្រែន បានខូចខាត។ ចំណែកអភិបាលតំបន់ Poltava លោក Filip Pronin បានសរសេរនៅលើ Telegram ថា នៅតំបន់ Poltava ភាគកណ្តាល ហេដ្ឋារចនាសម្ព័ន្ធថាមពលមួយត្រូវបានវាយប្រហារដោយយានដ្រូន រហូតបង្កឲ្យមានអគ្គិភ័យ តែបើយោងតាមព័ត៌មានបឋម មិនមានអ្នករងរបួសនោះទេ៕