ប្រទេសម៉ាសេដូនីខាងជើង នឹងចេញទៅបោះឆ្នោត នៅថ្ងៃពុធ (ទី៨ ខែឧសភា) នេះ នៅក្នុងការបោះឆ្នោតជ្រើសរើសសភា និងប្រធានាធិបតី ដែលគណបក្សប្រឆាំងស្តាំនិយម ត្រូវបានគេរំពឹងថា នឹងទទួលបានសំឡេងគាំទ្រច្រើនជាងគណបក្សកាន់អំណាច ដែលមិនបានដំណើរការកិច្ចចរចា ដើម្បីចូលរួមជាមួយសហភាពអឺរ៉ុប (EU) និងលុបបំបាត់អំពើពុករលួយ។
នៅមុនការបោះឆ្នោតនេះ គ្មានការស្ទង់មតិណាមួយត្រូវបានចេញផ្សាយនោះទេ ប៉ុន្តែការបង្ហាញឲ្យឃើញខ្លាំងជាងការរំពឹងទុកពីគណបក្សប្រឆាំង VMRO-DPMNE ក្នុងការបោះឆ្នោតជ្រើសរើសប្រធានាធិបតីជុំទី១ កាលពីខែមុន បង្ហាញថា អ្នកបោះឆ្នោតមានការខកចិត្តចំពោះគណបក្សប្រជាធិបតេយ្យសង្គមដែលកំពុងកាន់អំណាច។
អ្នកវិភាគបាននិយាយថា កិច្ចចរចាចូលជាសមាជិក EU អាចយឺតជាងមុន និងធ្វើឲ្យមានទំនាក់ទំនងស្មុគស្មាញជាមួយសមាជិក EU ដែលជាប្រទេសជិតខាងក្រិក និងប៊ុលហ្គារី។
គួរបញ្ជាក់ថា ការបោះឆ្នោតនៅថ្ងៃពុធនេះ រួមបញ្ចូលទាំងការបោះឆ្នោតសម្រាប់ការកាន់តំណែងជាប្រធានាធិបតីបន្ថេមទៀត និងសម្រាប់អាសនៈសភា។ ការបោះឆ្នោត ចាប់ផ្តើមនៅម៉ោង ៧ព្រឹក (ត្រូវនឹងម៉ោង ៥:០០ ម៉ោងសកល) ហើយនឹងបិទ នៅម៉ោង ៧យប់ (ម៉ោង ១៧:0០ម៉ោងសកល)។ គណៈកម្មាធិការរៀបចំការបោះឆ្នោតរដ្ឋ ត្រូវបានគេរំពឹងថា នឹងចាប់ផ្តើមប្រកាសលទ្ធផលពីការិយាល័យបោះឆ្នោតចំនួន ៣.៣៦០កន្លែង នៅយប់ថ្ងៃពុធនេះ។
លោក Hristijan Mickoski ប្រធានគណបក្ស VMRO-DPMNE បានថ្លែងប្រាប់អ្នកសារព័ត៌មាន នៅសប្តាហ៍នេះថា ៖«ខ្ញុំជឿថា នៅថ្ងៃពុធនេះ យើងនឹងទទួលបានជ័យជម្នះដោយគ្មានសង្ស័យទ្វេដង»។
ក្នុងឆ្នាំ២០០១ អង្គការណាតូបានជួយឲ្យប្រទេសម៉ាសេដូនីខាងជើងរួចផុតពីគែមនៃសង្រ្គាមស៊ីវិល អំឡុងមានការបះបោរជនជាតិអាល់បានី ហើយបានសន្យាថា នឹងធ្វើសមាហរណកម្មកាន់តែលឿនទៅក្នុង EU និងណាតូ។ ប្រទេសដែលមានប្រជាជនចំនួន ១,៨៣លាននាក់ បានចូលរួមជាមួយអង្គការណាតូក្នុងឆ្នាំ២០២០ ប៉ុន្តែប្រទេសនេះមានការរីកចម្រើនតិចតួចជាមួយ EU ដែលមួយផ្នែកដោយសារតែការប្រឆាំងពីសមាជិក EU គឺក្រិក និងប៊ុលហ្គារី៕