រុស្ស៊ីបានព្រមានបារាំងនៅថ្ងៃពុធ (ទី៨ ខែឧសភា) នេះថា ប្រសិនបើប្រធានាធិបតីលោក Emmanuel Macron បញ្ជូនទាហានទៅអ៊ុយក្រែននោះ ពួកគេនឹងត្រូវបានចាត់ទុកថា ជាគោលដៅស្របច្បាប់របស់យោធារុស្ស៊ី។

លោក Macron បានបង្កឲ្យមានភាពចម្រូងចម្រាស កាលពីខែកុម្ភៈ ដោយនិយាយថា លោកមិនអាចបដិសេធបាននោះឡើយ ក្នុងការដាក់ពង្រាយកងទ័ពជើងគោក នៅប្រទេសអ៊ុយក្រែន នាពេលអនាគត។ មេដឹកនាំបារាំងរូបនេះ បានព្រមានថា ប្រសិនបើរុស្ស៊ីឈ្នះនៅអ៊ុយក្រែននោះ ភាពជឿជាក់របស់អឺរ៉ុប នឹងត្រូវកាត់បន្ថយឲ្យធ្លាក់ដល់សូន្យ។

ពាក់ព័ន្ធនឹងការលើកឡើងរបស់ លោក Macron អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានប្រាប់អ្នកសារព័ត៌មានថា៖ «វាជាចរិតលក្ខណៈដែលលោក Macron ពន្យល់អំពីវោហាសាស្ត្រនេះ ដោយមានបំណងចង់បង្កើតប្រភេទនៃភាពមិនប្រាកដប្រជាជាយុទ្ធសាស្ត្រ សម្រាប់ប្រទេសរុស្ស៊ី»។

លោកស្រី Zakharova បានបន្ថែមថា៖ «យើងត្រូវតែធ្វើឲ្យគាត់ខកចិត្ត ពោលគឺសម្រាប់ពួកយើងស្ថានភាពមើលទៅលើសពីភាពជាក់លាក់។ ប្រសិនបើបារាំងបង្ហាញខ្លួន នៅក្នុងតំបន់ជម្លោះ ពួកគេនឹងក្លាយទៅជាគោលដៅរបស់កងកម្លាំងប្រដាប់អាវុធរុស្ស៊ីដោយចៀសមិនរួច។ ខ្ញុំជឿថា ទីក្រុងប៉ារីសដឹងពីរឿងនេះរួចហើយ»។

លោកស្រី Zakharova បានបញ្ជាក់ទៀតថា ប្រទេសរុស្ស៊ីកំពុងមើលឃើញរួចហើយនូវការកើនឡើងនៃចំនួនជនជាតិបារាំង ក្នុងចំណោមអ្នកដែលត្រូវបានសម្លាប់ នៅអ៊ុយក្រែន។

គួរបញ្ជាក់ថា កាលពីថ្ងៃចន្ទ (ទី៧ ខែឧសភា) រុស្ស៊ីបាននិយាយថា ខ្លួននឹងអនុវត្តការដាក់ពង្រាយអាវុធនុយក្លេអ៊ែរយុទ្ធសាស្ត្រ ជាផ្នែកនៃសមយុទ្ធយោធា បន្ទាប់ពីមាននូវអ្វីដែលក្រុងម៉ូស្គូបាននិយាយថា ជាការគំរាមកំហែងពីប្រទេសបារាំង អង់គ្លេស និងសហរដ្ឋអាមេរិក៕