ប្រព័ន្ធផ្សព្វផ្សាយរដ្ឋ នៅថ្ងៃពុធ (ទី៨ ខែឧសភា) នេះ បានរាយការណ៍ថា នគរបាលវៀតណាម បានចាប់ខ្លួនមនុស្សចំនួន ២០នាក់ ពីបទលួចចូល និងគ្រប់គ្រងគណនី Facebook រាប់ម៉ឺនគណនី ទាំងណៅក្នុងស្រុក និងក្រៅស្រុក ដោយប្រមូលបានប្រាក់ចំណេញជិត ៤លានដុល្លារ។

បើយោងតាមសារព័ទ៌មាន VNExpress បានឲ្យដឹងថា ក្រុមនេះត្រូវបានចោទប្រកាន់ពីបទបង្កើត និងបញ្ចេញចែកមេរោគ ដើម្បីលួចចូលគណនីអាជីវកម្មដែលមានតម្លៃខ្ពស់ជាង ២៥.០០០គណនី។ នគរបាលសន្តិសុខតាមប្រព័ន្ធអ៊ីនធឺណិត បានធ្វើប្រតិបត្តិការចាប់ខ្លួននេះ អំឡុងពេលមានការវាយឆ្មក់ចូលជាច្រើននៅទូទាំងទីក្រុងហាណូយ មជ្ឈមណ្ឌលពាណិជ្ជកម្មទីក្រុងហូជីមិញ និងខេត្ត Nam Dinh ភាគខាងជើង កាលពីខែមេសា។

ក្រុមខិលខូចនេះត្រូវបានគេជឿថា ដឹកនាំដោយឈ្មោះ Dang Dinh Son វ័យ ៣១ឆ្នាំ ដែលបានទិញប្រភពមេរោគតម្លៃ ១.២០០ដុល្លារអាមេរិក ដើម្បីយកទៅប្រើលួចយកព័ត៌មានគណនីអ្នកប្រើប្រាស់ Facebook។ ប្រព័ន្ធផ្សព្វផ្សាយរដ្ឋបានឲ្យដឹងថា បុរសមកពីខេត្ត Nam Dinh រូបនេះ បានប្រើមេរោគនេះ ដើម្បីគ្រប់គ្រងទំព័រ Facebook អ្នកគាំទ្រដ៏ពេញនិយមចំនួន២ ដែលទាក់ទងនឹងគេហទំព័រកែរូបថត គឺ «Art Bay AI» និង «Evoto Studio»។

បន្ទាប់មកពួកគេបានល្បួងឲ្យអ្នកប្រើប្រាស់ Facebook ទាញយក និងដំឡើងកម្មវិធីដែលមេរោគនឹងជ្រៀតចូលឧបករណ៍របស់អ្នកប្រើប្រាស់។ ទិន្នន័យដែលលួចបាន ត្រូវបានប្រមូល និងបញ្ជូនត្រឡប់ទៅម៉ាស៊ីនមេដែលគ្រប់គ្រងដោយលោក Son ហើយបន្ទាប់មកចែកចាយទៅក្រុមចំនួន៥ នៅលើ Telegram ដើម្បីអាចឲ្យសមាជិកក្រុមរបស់គេលួចចូលគណនីអ្នកប្រើប្រាស់៕