យោងតាមរបាយការណ៍មួយ បានឲ្យដឹងថា ក្រុមហ៊ុនសន្តិសុខឯកជនរបស់សហរដ្ឋអាមេរិក នឹងទទួលបន្ទុកគ្រប់គ្រងច្រកព្រំដែនរ៉ាហ្វា ( Rafah) បន្ទាប់ពីបញ្ចប់ប្រតិបត្តិការយោធាអ៊ីស្រាអែល នៅក្នុងទីក្រុងនៅតាមព្រំដែនក្បែរប្រទេសអេហ្ស៊ីប។

សារព័ត៌មានអ៊ីស្រាអែល Haaretz បានរាយការណ៍កាលពីល្ងាចថ្ងៃអង្គារថា អ៊ីស្រាអែល សហរដ្ឋអាមេរិក និងអេហ្ស៊ីប បានព្រមព្រៀងគ្នាលើការគ្រប់គ្រងច្រកនេះ ទោះបីជាវាមិនច្បាស់ថា ក្រុមហ៊ុនណាដែលត្រូវពាក់ព័ន្ធក៏ដោយ។

រដ្ឋាភិបាលអ៊ីស្រាអែល មិនចង់ធ្វើអត្ថាធិប្បាយអំពីរបាយការណ៍នេះទេ នៅពេលត្រូវបានគេសួរ។ នៅសហរដ្ឋអាមេរិក ប្រធានផ្នែកទំនាក់ទំនងនៃក្រុមប្រឹក្សាសន្តិសុខជាតិ លោក John Kirby បាននិយាយថា លោក មិនដឹងអ្វីទាំងអស់អំពីរឿងនេះ។

យោធាអ៊ីស្រាអែល បានឈានចូលទៅក្នុងផ្នែកខ្លះនៃក្រុងរ៉ាហ្វា ក្នុងតំបន់ហ្កាហ្សាស្ទ្រីប ហើយក៏បានគ្រប់គ្រងច្រកព្រំដែននៅខាងប៉ាឡេស្ទីន។

សារព័ត៌មាន Haaretz បានឲ្យដឹងទៀតថា អ៊ីស្រាអែល បានសន្យាថា នឹងមិនធ្វើឲ្យខូចសម្ភារៈបរិក្ខារឆ្លងកាត់ព្រំដែន ដើម្បីធានាបាននូវប្រតិបត្តិការរបស់ខ្លួន បន្តទៀត។