រុស្ស៊ី នៅថ្ងៃពុធ (ទី៨ ខែឧសភា) នេះ បាននិយាយថា ការបញ្ជូនទាហានរបស់អង្គការណាតូចូលទៅក្នុងដែនដីអ៊ុយក្រែន អាចប្រឈមនឹងគ្រោះថ្នាក់ខ្លាំងក្លា ហើយទីក្រុងមូស្គូកំពុងតាមឃ្លាំមើលយ៉ាងដិតដល់នូវញត្តិរបស់អ៊ុយក្រែនដែលអំពាវនាវឲ្យមានអន្តរាគមន៍បែបនេះ។

ញត្តិដែលបានបង្ហោះនៅលើគេហទំព័ររបស់ប្រធានាធិបតីអ៊ុយក្រែន រៀបរាប់ថា អ៊ុយក្រែនគួរតែស្នើឲ្យសហរដ្ឋអាមេរិក អង់គ្លេស និងប្រទេសដទៃទៀត បញ្ជូនកងទ័ពមកជួយប្រទេសនេះ ប្រឆាំងនឹងការលុកលុយរបស់រុស្ស៊ី។

ពេលត្រូវបានសួរអំពីញាត្តិនោះ នៅឯសន្និសីទប្រចាំថ្ងៃ អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «របបទីក្រុងគីវ គឺពិតជាពិបាកទាយទុកមុនបន្តិច។ តែយើងបាននិយាយម្តងហើយម្តងទៀតថា អន្តរាគមន៍ដោយផ្ទាល់នៅលើដែនដីក្នុងជម្លោះនេះរបស់យោធានៃបណ្ដាប្រទេសសមាជិកណាតូ អាចជួបនឹងនូវគ្រោះថ្នាក់យ៉ាងធ្ងន់ធ្ងរ ដូច្នេះ យើងចាត់ទុកថា នេះគឺជាការបង្កហេតុដ៏គឃ្លើនបំផុត មិនមែនរឿងតូចតាចទេ ហើយជាការពិតណាស់ យើងកំពុងតាមមើលរឿងនេះយ៉ាងយកចិត្តទុកដាក់»។

គួរបញ្ជាក់ថា អង្គការណាតូបានគាំទ្រអ៊ុយក្រែន ក្នុងសង្រ្គាមនេះ ដោយផ្តល់ឲ្យប្រទេសនេះនូវសព្វាវុធដ៏ច្រើន ក្នុងនោះរួមមានទាំងរថក្រោះ និងមីស៊ីលរយៈចម្ងាយឆ្ងាយ ប៉ុន្តែមិនបានធ្វើអន្តរាគមន៍ដោយផ្ទាល់ជាមួយកម្លាំងកងទ័ពនោះទេ ពោលគឺជាអ្វីមួយ ដែលទាំងប្រធានាធិបតីអាមេរិកលោក Joe Biden និងប្រធានាធិបតីរុស្ស៊ីលោក Vladimir Putin បានព្រមានដូចគ្នាថា អាចនាំទៅដល់សង្គ្រាមលោកលើកទី៣៕