នាយករដ្ឋមន្ត្រីថៃ លោក Srettha Thavisin (សេដ្ឋា ថាវីស៊ីន) នៅថ្ងៃពុធ (ទី៨ ខែឧសភា) នេះ បាននិយាយថា កញ្ឆានឹងត្រូវចុះក្នុងបញ្ជីសារធារុគ្រឿងញៀនឡើងវិញ នៅចុងឆ្នាំ២០២៤ នេះ ដែលនេះគឺជាការកែប្រែដ៏គួរឲ្យភ្ញាក់ផ្អើល សម្រាប់ប្រទេសនេះ ពោលគឺមានរយៈពេល ២ឆ្នាំ បន្ទាប់ពីខ្លួនបានក្លាយជាប្រទេសដំបូងគេ នៅក្នុងតំបន់ ដែលលុបចោលទោសព្រហ្មទណ្ឌ សម្រាប់ការប្រើប្រាស់បែបកម្សាន្តចំពោះរុក្ខជាតិនេះ។

លោក សេដ្ឋា បានឲ្យដឹងនៅបណ្ដាញសង្គម X ថា៖ «ខ្ញុំចង់ឲ្យក្រសួងសុខាភិបាលធ្វើវិសោធនកម្មច្បាប់ និងចុះបញ្ជីកញ្ឆាឡើងវិញថា ជាគ្រឿងញៀន។ ក្រសួងគួរតែចេញច្បាប់មួយយ៉ាងឆាប់រហ័ស ដើម្បីអនុញ្ញាតឲ្យមានការប្រើប្រាស់វា ក្នុងគោលបំណងសុខភាព និងវេជ្ជសាស្ត្រតែប៉ុណ្ណោះ»។

គួរបញ្ជាក់ថា លោក សេដ្ឋា ដែលជាមហាសេដ្ឋីអចលនទ្រព្យ បានបង្ហាញការប្រឆាំងរបស់លោក ចំពោះការប្រើប្រាស់កញ្ឆា សម្រាប់ការកម្សាន្ត ចាប់តាំងពីចូលកាន់តំណែង ក្នុងឆ្នាំ២០២៣ ដោយលើកហេតុផលថា វាអាចធ្វើឲ្យបញ្ហាគ្រឿងញៀនដែលមានស្រាប់នៅក្នុងប្រទេសថៃកាន់តែធ្ងន់ធ្ងរឡើងៗ។

សូមបញ្ជាក់បន្ថែមថា ក្រោមការដឹកនាំរបស់រដ្ឋាភិបាលមុន រុក្ខជាតិកញ្ឆាត្រូវបានលុបចោលពីទោសព្រហ្មទណ្ឌ សម្រាប់ការប្រើប្រាស់ផ្នែកវេជ្ជសាស្រ្ត ក្នុងឆ្នាំ២០២៨ និងការប្រើប្រាស់បែបកម្សាន្តនៅឆ្នាំ២០២២ ដែលការសម្រេចនោះបាននាំឲ្យមានកំណើនយ៉ាងឆាប់រហ័សនូវអាជីវកម្មខ្នាតតូចលក់ផលិតផលកញ្ឆា ដែលឥឡូវនេះមានចំនួនរាប់ម៉ឺនកន្លែង៕