ប្រធានគណបក្សជាតិស្កុតឡែន (SNP) លោក John Swinney នៅថ្ងៃពុធ (ទី៨ ខែឧសភា) បានស្បថចូលកាន់តំណែងជារដ្ឋមន្ត្រីទី១ ថ្មីរបស់ប្រទេសស្កុតឡែន។
លោក Swinney បានក្លាយជាប្រមុខរដ្ឋាភិបាលផ្ទេរឲ្យរបស់ប្រទេសស្កុតឡែនជាផ្លូវការ បន្ទាប់ពីមានពិធីផ្លូវការ ក្នុងរដ្ឋធានី Edinburgh។ យោងតាមសេចក្ដីរាយការណ៍នានា បានឲ្យដឹងថា អ្នកនយោបាយវ័យ ៦០ឆ្នាំរូបនេះ ត្រូវបានគេរំពឹងថា នឹងបង្កើតរដ្ឋាភិបាលរបស់លោក ក្នុងពេលឆាប់ៗនេះ ដោយមុខតំណែងគណៈរដ្ឋមន្ត្រីទំនងជានឹងប្រកាសនៅយប់ថ្ងៃពុធនេះ។
គួរបញ្ជាក់ដែរថា ការស្បថចូលកាន់តំណែងនេះបានកើតឡើងបន្ទាប់ពីលោក Swinney ដែលជាអតីតអនុរដ្ឋមន្ត្រីទី១ កាលពីថ្ងៃអង្គារ (ទី៧ ខែឧសភា) ត្រូវបានបោះឆ្នោតឲ្យធ្វើតួនាទីជំនួសលោក Humza Yousaf ដែលបានលាលែង កាលពីថ្ងៃទី២៩ ខែមេសា។
លោកបានទទួលការគាំទ្រ ៦៤សំឡេងពីសមាជិកសភាស្កុតឡែន ខណៈពេលដែលប្រធានគណបក្សអភិរក្សនិយមស្កុតឡែន លោក Douglas Ross មានសំឡេងគាំទ្រ ៣១សំឡេង តាមមកដោយមេដឹកនាំគណបក្សការងារស្កុតឡែន លោក Anas Sarwar ២២សម្លេង ហើយប្រធានគណបក្សប្រជាធិបតេយ្យសេរីស្កុតឡែន លោក Alex Cole-Hamilton ទទួលបាន ៤សំឡេង។
បន្ទាប់ពីការបោះឆ្នោតនេះ លោក Swinney បាននិយាយថា៖ «វាជាការទទួលបានកិត្តិយសដ៏ធំធេងក្នុងជីវិតរបស់ខ្ញុំ ដែលមានឱកាសធ្វើជារដ្ឋមន្ត្រីទី១ របស់ស្កុតឡែន។ ខ្ញុំនឹងក្លាយជារដ្ឋមន្ត្រីដំបូងគេ សម្រាប់អ្នករាល់គ្នា ក្នុងប្រទេសរបស់យើង»៕