នគរបាលជាតិ នៅថ្ងៃពុធ (៨ ឧសភា) នេះ បានឲ្យដឹងថា អាជ្ញាធរអ៊ុយក្រែនសង្ស័យថា មហាសេដ្ឋីលោក Ihor Kolomoisky ដែលជាប់ពន្ធនាគារ គឺជាអ្នកនៅពីក្រោយការប៉ុនប៉ងធ្វើឃាតលើមេធាវី ក្នុងជម្លោះសាជីវកម្ម កាលពីជាង ២០ឆ្នាំមុន។

លោក Kolomoisky ដែលគាំទ្រប្រធានាធិបតីលោក Volodymyr Zelenskiy ក្នុងការបោះឆ្នោតឆ្នាំ២០១៩ និងដែលប្រឈមនឹងការចោទប្រកាន់ពីបទក្លែងបន្លំ និងសម្អាតលុយកខ្វក់នោះ បានបដិសេធកាលពីមុនថា មិនបានប្រព្រឹត្តខុសឡើយ នៅក្នុងករណីទាំងនោះ។ មេធាវីរបស់លោកមិនបានឆ្លើយតបភ្លាមៗ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយលើករណីប៉ុនប៉ងធ្វើឃាតនេះ។

នគរបាលបានឲ្យដឹងនៅក្នុងសេចក្តីថ្លែងការណ៍មួយថា៖ «អ្នកស៊ើបអង្កេតនគរបាល បានផ្ដល់ព័ត៌មានអំពីការសង្ស័យ ចំពោះអ្នកមានទ្រព្យធនអ៊ុយក្រែនដ៏លេចធ្លោម្នាក់ ពាក់ព័ន្ធនឹងការបញ្ជាឲ្យមានអំពើឃាតកម្មគិតទុកជាមុន»។

បើទោះបីជាពួកគេមិនបានកំណត់អត្តសញ្ញាណរូបលោកតាមរយៈឈ្មោះក៏ដោយ ក៏ការបង្ហោះរូបថតបុរសម្នាក់ដែលមើលមុខមិនច្បាស់ អាចត្រូវបានសម្គាល់យ៉ាងងាយថា ជាលោក Kolomoisky ជាអ្នកមានបំផុតម្នាក់របស់ប្រទេសអ៊ុយក្រែន ដែលត្រូវបានឃុំខ្លួន កាលពីរដូវស្លឹកឈើជ្រុះឆ្នាំមុន។

នគរបាលបានប្រាប់បន្ថែមថា ការស្វែងរកចំនួន ២៣កន្លែង កំពុងបន្តធ្វើនៅក្នុងតំបន់អ៊ុយក្រែនចំនួន ៤ នាថ្ងៃពុធនេះ ដើម្បីប្រមូលភស្តុតាងបន្ថែមទាក់ទងនឹងករណីនេះ។

សូមបញ្ជាក់បន្ថែមថា លោក Kolomoisky ដែលជាអតីតម្ចាស់ធនាគារ PrivatBank ស្ថិតនៅក្រោមការដាក់ទណ្ឌកម្មរបស់សហរដ្ឋអាមេរិក ហើយប្រឈមនឹងការចោទប្រកាន់ជាច្រើនករណី ទាក់ទងនឹងការក្លែងបន្លំ ការសម្អាតកខ្វក់ និងការកេងបន្លំ។ តែរាល់ការចោទប្រកាន់ទាំងនោះ ត្រូវបានលោកបដិសេធ៕