បងប្អូនពលរដ្ឋខ្មែរទាំងក្នុង និងក្រៅប្រទេស នាថ្ងៃទី៩ ខែឧសភា ឆ្នាំ២០២៤នេះ បាន​បន្ត​ចេញ​វិដេអូ​ឃ្លីប និងដូរប្រូហ្វាលហ្វេសបុករបស់ខ្លួន(Facebook Frame) ប្រកាសគាំទ្រ យ៉ាងពេញ​ទំហឹង​នូ​វគម្រោង«ព្រែកជីកហ្វូណនតេជោ» ខណៈគម្រោងដែលគ្រោងនឹងចំណាយថវិកា ជិត​ពីរ​ពាន់​លានដុល្លារមួយនេះ​អាចនឹងបើកការដ្ឋានសាងសង់​នូវចុងឆ្នាំ២០២៤ ឬ​យូរ​បំផុត​ដើម​ឆ្នាំ២០២៥ បើ​ទោះជាគ្មានលុយពីបរទេសក៏កម្ពុជា​នឹងខិតខំធ្វើ​យ៉ាង​ណា​ឲុ្យ​គម្រោង​នេះ​ឲ្យសម្រេច​ទាល់តែបានផងដែរ។

ការបន្តប្រកាសគាំទ្រដល់ការអនុវត្តគម្រោង«ព្រែកជីកហ្វូណនតេជោ»ពីសំណាក់ មហាជន​នេះ​មក​ពីគ្រប់ទិសទីនេះ ដោយពួកគេមើលឃើញពីអនាគតថា ការធ្វើព្រែកជីកហ្វូណនតេជោនេះ នឹង​ធ្វើ​ឲ្យចរន្តសេដ្ឋកិច្ចកម្ពុជាកាន់តែរីកចម្រើនបន្ថែមទៀតដូចអ្វីដែលសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធាន​គណបក្សប្រជាជនកម្ពុជា​បានប្រកាស​ពន្យល់ដល់​បងប្អូន​ប្រជាពលរដ្ឋខ្មែរ​យ៉ាងដូច្នេះដែរ។

សូមបញ្ជាក់ថា គម្រោង«ព្រែកជីកហ្វូណនតេជោ» តភ្ជាប់ផ្លូវទឹករវាងទន្លេរទៅកាន់សមុទ្រកម្ពុជា ដោយ​ឆ្លងកាត់ ខេត្តកណ្តាល តាកែវ កំពត និងខេត្តកែប ដែលមានប្រវែង១៨០គីឡូម៉ែត្រ។ ព្រែក​ជីក​ហ្វូណនតេជោ និងផ្តល់អត្ថប្រយោជន៍ដ៏មហាសាលដល់ប្រទេសកម្ពុជា ជាពិសេស​វិស័យ​ដឹក​ជញ្ជូន ដូចជា កាត់បន្ថយតម្លៃដឹកជញ្ជូន កាត់បន្ថយពេលវេលា ចម្ងាយ ការខូចខាតផ្លូវថ្នល់ ការ​កក​ស្ទះ​ចរាចរណ៍ គ្រោះថ្នាក់ចរាចរណ៍ ក៏ដូចជាកាត់ បន្ថយនីតិវិធីសម្រាប់នាវា និងបែប​បទ​ក្នុង​ការឆ្លងកាត់ទំនិញពីកម្ពុជាទៅសមុទ្រ ការបង្កើតតំបន់ពាណិជ្ជកម្ម តំបន់សេដ្ឋកិច្ចពិសេស ការ​អភិវឌ្ឍ​ផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ ជួយ​រំដោះទឹកជំនន់ក្នុងរដូវវស្សា ជួយបង្កើនផលត្រីទឹកសាបនៅតាមព្រែក អចលនទ្រព្យ និង​ការ​វិនិយោគ​ផ្សេងៗជាច្រើនទៀត និយាយជារួម គម្រោងព្រែកជីកហ្វូណនតេជោនេះ គឺជាគម្រោង​បម្រើ​ផលប្រយោជន៍ជាតិដ៏ធំធេង ជាពិសេស ផ្នែកសេដ្ឋកិច្ចសង្គមនៅកម្ពុជាតែម្តង៕ អត្ថបទ៖ បាន ចក់