​ប្រណាំង​រថយន្ត៖ ​កីឡាករ​បារាំង Esteban Ocon ដណ្តើមបាន​ជ័យជំនះ​ដំបូង​ក្នុង​អាជីព F1 បន្ទាប់ពី​ជ័យជំនះនៅលើ​ទឹកដី​ហុង​គ្រី​ថ្ងៃអាទិត្យ​ម្សិលមិញ​។ ​ការប្រកួត​ដែល​ចាប់ផ្តើម​ដោយ​សំណើម​នៅលើ​ទីលាន បន្ទាប់ពី​មាន​ភ្លៀង​ធ្លាក់ការចាប់ផ្តើម​ក៏មាន​ភាពច្របូកច្របល់​ដែរ ​ដោយ​រថយន្ត​ជាច្រើន​រអិល​ប៉ះទង្គិច​គ្នា​នៅ​ផ្លូវបត់​ទី១ តែម្តង រហូត​ការប្រកួត​ត្រូវបាន​បញ្ឈប់​ដើម្បី​សំអាត​កម្ទេចដែល​ខ្ទាត​នៅលើ​ទីលាន​។

​​ការចាប់ផ្តើម​ឡើងវិញ​មានតែ​រថយន្ត Lewis Hamilton ម្នាក់ឯង​ដែល​នៅ​ប្រើប្រាស់​កង់​សំរាប់​ទីលាន​រអិល ក្រៅពីនោះ​រថយន្ត​ផ្សេង​បាន​ចូល Pit Stop ផ្លាស់ប្តូរ​កង់​សំរាប់​ទីលាន​ស្ងួត​វិញ​។ ​ចាប់ផ្តើម​ម្នាក់ឯង Hamilton នាំមុខ​ការប្រកួត​មិនយូរ​ឡើយ ពោលគឺ​ត្រូវ​ផ្លាស់ប្តូ​រកង់​ដូច​រថយន្ត​ដទៃ​ដែរ ដែល​ធ្វើឱ្យ​កីឡាករ​របស់​ក្រុម Alpine, Esteban Ocon ឡើងមក​នាំមុខគេ​ក្នុងការ​ប្រកួត​តាំងពី​ពេល​នោះមក​រហូត​ដល់ទី​ព្រ័ត្រ​។ ​Hamilton ត្រូវ​ធ្លាក់​ដល់​លេខ ១៣ មុនពេល​ព្យាយាម​ដេញ​ពីក្រោយ​រហូត​ប្រជែង​បាន​ចំណាត់ថ្នាក់​លេខ៣ ដែល​គេ​ឃើញ​មានការ​ប្រជែង​ខ្លាំង​ជាមួយ Fernando Alonso និង Carlos Sainz​។ ​ចប់​ការប្រកួត Esteban Ocon ជា​អ្នកឈ្នះ និង​តាម​ពីក្រោយ​ដោយ​មិត្ត​រួម​ក្រុម Alpine, Sebastian Vettel តែ​ក្រោយមក​កីឡាករ​អាល្លឺម៉ង់​រូប​នេះ​ត្រូវ​បាន​គេ​លុបចោល​ចំណាត់ថ្នាក់​វិញ​ ក្រោយ​កំហុស​ប្រើប្រាស់​កម្រិត​សាំង​មិន​ប្រក្រតី​។

​​Lewis Hamilton ដែល​បាន​លេខ៣ ត្រូវ​រំកិល​ឡើង​មក​លេខ២ តែ​ត្រូវ​រង់ចាំ​ការ​ប្តឹង​តវ៉ា​ពី Vettel ទៅ​កាន់ FIA​។ ​អ្នក​នាំមុខ​ក្នុង​តារាង​ជើងឯក​ពិភពលោក Max Verstappen បានបញ្ចប់​នៅ​ហុង​គ្រី​នេះ​ត្រឹម​លេខ ១០ ប៉ុណ្ណោះ​ដែល​ធ្វើឱ្យ​តំណែង​នាំមុខគេ​នេះ​ធ្លាក់​ទៅ Lewis Hamilton វិញ​មាន ១៩២ពិន្ទុ​ពីលើ Verstappen ៦ពិន្ទុ​។ ​ក្រោយពី​ការប្រកួត​នៅ​ហុង​គ្រី​នេះ F1 ត្រូវ​សម្រាក​ជិត​មួយខែ​មុន​ត្រលប់​មកវិញ​នៅ​ថ្ងៃទី២៩ ចុងខែ​សីហា​នេះ​ព្រឹត្តិការណ៍ F1 នៅ​ប្រទេស​ប៊ែ​ល​ហ្ស៊ិ​ក​៕

​អត្ថបទ​៖​នាង សុភា​វុ​ធ