យោធារបស់ប្រទេសចិន បានរិះគន់ការឆ្លងកាត់របស់នាវាពិឃាតអាមេរិកនៅច្រកសមុទ្រតៃវ៉ាន់ ដែលបានកើតឡើងមិនដល់ពីរសប្តាហ៍ មុនមេដឹកនាំថ្មីរបស់កោះនេះ ចូលកាន់តំណែង ខណៈទីក្រុងវ៉ាស៊ីនតោន និងទីក្រុងប៉េកាំង កំពុងខិតខំប្រឹងប្រែងមិនទាន់បានរលូន ក្នុងការស្តារការផ្លាស់ប្តូរយោធាជាទៀងទាត់។

លោកឧត្តមនាវីឯក Li Xi អ្នកនាំពាក្យនៃបញ្ជាការដ្ឋានភូមិភាគខាងកើតរបស់ចិន បានចោទប្រកាន់សហរដ្ឋអាមេរិកថា ការបើកនាវា USS Halsey ឆ្លងកាត់ច្រកនេះ កាលពីថ្ងៃពុធ គឺជាសកម្មភាពបំពានជាសាធារណៈ។

នៅក្នុងសេចក្តីថ្លែងការណ៍មួយ លោក Li បាននិយាយថា បញ្ជាការដែលត្រួតពិនិត្យប្រតិបត្តិការនៅជុំវិញច្រកសមុទ្រនេះ បានរៀបចំកងកម្លាំងជើងទឹក និងអាកាស ដើម្បីតាមដានសកម្មភាពឆ្លងកាត់របស់នាវា និងដោះស្រាយបញ្ហានានាដោយស្របតាមច្បាប់ និងបទប្បញ្ញត្តិ។

កងអង្គភាពនាវាចរទី ៧ នៃកងទ័ពជើងទឹករបស់សហរដ្ឋអាមេរិក បាននិយាយថា កងនាវាចរ ហាលស៊ី (Halsey) បានឆ្លងកាត់ច្រកសមុទ្រតៃវ៉ាន់ជាប្រចាំកាលពីថ្ងៃទី ៨ខែឧសភា តាមរយៈដែនទឹក ជាទីដែលសេរីភាពនៃការធ្វើនាវាចរណ៍ និងការហោះហើរលើសមុទ្រ នេះ ត្រូវបានអនុវត្តស្របតាមច្បាប់អន្តរជាតិ។

សេចក្តីថ្លែងការណ៍របស់កងនាវា បាននិយាយថា នាវាពិឃាតបំពាក់មីស៊ីល អាឡេ ប៊កេ (Arleigh Burke) បានឆ្លងកាត់ច្រករបៀងមួយក្នុងច្រកសមុទ្រដែលហួសពីដែនសមុទ្រ នៃតំបន់ឆ្នេររបស់រដ្ឋណាមួយ៕