រដ្ឋាភិបាលបែលហ្ស៊ិក បាននិយាយថា ក្រុមឯកអគ្គរដ្ឋទូតមកពីបណ្តាប្រទេសសហភាពអឺរ៉ុប បានព្រមព្រៀងគ្នាកាលពីថ្ងៃពុធ (០៨ ឧសភា) ដើម្បីប្រើប្រាស់ប្រាក់ចំនេញពីទ្រព្យសម្បត្តិរបស់ធនាគារកណ្តាលរុស្ស៊ី ដែលត្រូវបានបង្កកនៅក្នុងសហភាពអឺរ៉ុប សម្រាប់វិស័យការពារជាតិរបស់អ៊ុយក្រែន។

ប្រភពការទូតចំនួនបួនរបស់សហភាពអឺរ៉ុបបាននិយាយថា ក្រុមរដ្ឋមន្ត្រីនៅតែត្រូវអនុម័តលើសេចក្ដីស្នើច្បាប់ ដែលនឹងមើលឃើញ ៩០ ភាគរយនៃប្រាក់ចំណូលចូលទៅក្នុងមូលនិធិរុស្ស៊ី ដែលគ្រប់គ្រងដោយសហភាពអឺរ៉ុប សម្រាប់ជំនួយយោធាអ៊ុយក្រែន ហើយ ១០ ភាគរយទៀតនឹងគាំទ្រដល់ទីក្រុងគីវ តាមមធ្យោបាយផ្សេងៗទៀត។

ក្រុមប្រទេសទាំងប្រាំពីរ (G7) បានបង្កកទ្រព្យសម្បត្តិហិរញ្ញវត្ថុរបស់រុស្ស៊ី ដែលមានតម្លៃប្រហែល ៣០០ ពាន់លានដុល្លារ ភ្លាមៗបន្ទាប់ពីការលុកលុយរបស់ទីក្រុងមូស្គូ លើអ៊ុយក្រែន ក្នុងឆ្នាំ២០២២។ ចាប់តាំងពីពេលនោះមក សហភាពអឺរ៉ុប និងប្រទេស G7 ផ្សេងទៀតបានពិភាក្សាគ្នាអំពីមធ្យោបាយ និងថាតើត្រូវប្រើប្រាស់មូលនិធិនេះបែបណាដើម្បីជួយអ៊ុយក្រែន។

សហរដ្ឋអាមេរិក បានស្នើរឹបអូសទ្រព្យសម្បត្តិទាំងអស់ ប៉ុន្តែអឺរ៉ុប បានច្រានចោល ដោយលើកឡើងពីហានិភ័យចំពោះប្រាក់អឺរ៉ូ និងផលប៉ះពាល់ផ្លូវច្បាប់ដ៏ធំ។ ថ្មីៗនេះ រដ្ឋាភិបាលក្រុងវ៉ាស៊ីនតោន បានជំរុញឱ្យប្រើប្រាស់ទ្រព្យសម្បត្តិជាទ្រព្យបញ្ចាំដើម្បីផ្តល់កម្ចីសម្រាប់អ៊ុយក្រែន។

នៅចុងខែមេសា មន្ត្រីរុស្ស៊ី បានគំរាមលោកខាងលិច ជាមួយនឹងការឆ្លើយតប «យ៉ាងធ្ងន់ធ្ងរ» និងការប្រឈមបញ្ហាផ្លូវច្បាប់ «គ្មានទីបញ្ចប់» ប្រសិនបើទ្រព្យសម្បត្តិខ្លួនត្រូវបានប៉ះពាល់៕