នៅថ្ងៃទី ៩ ខែឧសភានេះ ឯកឧត្តម ឡាវ វ៉ាន់ សមាជិកគណៈកម្មាធិការអាហារូបករណ៍ សម្ដេច​អគ្គ​មហា​សេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត បាន​អញ្ជើញ​ប្រគល់​លិខិត​ឧទ្ទេស​នាម​ផ្តល់អាហារូបករណ៍សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) ជូន​សិស្សនិស្សិត ឆ្នាំសិក្សាថ្មី ២០២៣ -២០២៤ ចំនួន២៥៥នាក់ សិក្សា​នៅ​តាម​សកល​វិទ្យាល័យ​ល្បីៗ កម្រិតជាតិ និងអន្តរជាតិនៅកម្ពុជា ។

ក្រុមសិស្សនិស្សិត បានបង្ហាញក្តីរំភើបដែលបានទទួលអាហារូបករណ៍សម្តេចតេជោ ហ៊ុន សែន និង​សម្តេចកិត្តិព្រឹទ្ធបណ្ឌិត តាមរយៈសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និង​លោកជំទាវ សម្រាប់ការសិក្សានៅតាមសកលវិទ្យាល័យល្បីៗកម្រិតជាតិ និងអន្តរជាតិ។ ពួក​គេ​បាន​ប្តេជ្ញា​ខិតខំសិក្សាក្រេបយកចំណេះដឹងជំនាញ និងធ្វើជាធនធានមនុស្សដ៏ល្អ មាន​តម្លៃ​សម្រាប់​ការ​អភិវឌ្ឍប្រទេសជាតិ ។

ឯកឧត្តម ត្រាំង លី អនុប្រធានក្រុមការងារគ្រប់គ្រងនិសិ្សត អ.ម.ត ក្រុម ២ ថ្លែងថា នៅក្នុង​ដំណើរ​ការ​ជ្រើសរើសនិស្សិតរៀនថ្នាក់អាហារូបករណ៍សម្តេចតេជោ ហ៊ុន សែន និងសម្តេច​កិតិ្តព្រឹទ្ធ​បណ្ឌិត ទាំង២៥៥នាក់ មានសិស្សចំនួន១៤៥នាក់ គឺបានជ្រើសរើស​តាមរយៈ​ការ​ចាប់ឆ្នោត​ជ្រើសរើស​គ្រឹះស្ថានសម្រាប់សិក្សានៅសកលវិទ្យាល័យជាតិគ្រប់គ្រង និងវិទ្យាស្ថាន​បច្ចេក​ទេស​កម្ពុជា។ ដោយឡែកសិស្សចំនួន១១០ទៀត គឺជ្រើសរើសតាមរយៈការប្រឡង សម្រាប់​ការ​សិក្សានៅសកលវិទ្យាល័យអាមេរិចកាំងភ្នំពេញ និងសកលវិទ្យាល័យលីមកុកវិញ។

ឯកឧត្តម ឡាវ វ៉ាន់ ថ្លែងថា បច្ចុប្បន្នមាននិស្សិតជិត៦៥០នាក់ ក្នុងនោះមានស្ត្រី៣២៥នាក់ បាន​និង​កំពុង​ថ្នាក់អាហារូបករណ៍សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ថ្នាក់បរិញ្ញា​បត្រ​រង ១៥រូប បរិញ្ញាបត្រ ៦២៤នាក់ និងថ្នាក់បរិញ្ញាបត្រជាន់ខ្ពស់៨រូប កំពុងសិក្សា​នៅ​សកល​វិទ្យាល័យ​ធំៗ ទាំង៤ខាងលើនេះ ។

ឯកឧត្តមបន្តថា សម្តេចតេជោ ហ៊ុន សែន បានបង្កើតកម្មវិធីផ្តល់អាហារូបករណ៍ តាមរយៈ​ថវិកា​ផ្ទាល់​ខ្លួន រហូតបង្កើតគណៈកម្មាធិការអាហារូបករណ៍នៅឆ្នាំ២០០៧ ដែលដឹកនាំ​សម្តេច​ធិបតី​ ហ៊ុន ម៉ាណែត ដែលជាបញ្ញាវ័នឆ្នើមសម្រាប់កម្ពុជា ហើយរហូតមកដល់បច្ចុប្បន្ន សិស្សនិ​ស្សិត​ជាង ៣ម៉ឺននាក់ បានទទួលឱកាសសិក្សាជំនាញ ឯកទេសថ្នាក់បរិញ្ញាបត្ររង បរិញ្ញាបត្រ និង​បរិញ្ញា​បត្រ​ជាន់ខ្ពស់តាមវិទ្យាស្ថាន សកលវិទ្យាល័យនានា ក្នុងប្រទេសកម្ពុជា៕ អត្ថបទ ស៊ុម សុខជា