យុវជនចាប់ផ្ដមចូលរួមពិព័រណ៍ការងារ និងមគ្គទេស៍អាជីព នៅព្រឹកថ្ងៃទី៩ ខែឧសភា ឆ្នាំ២០២៤នេះ ដែលមានការចូលរួមពីក្រុមហ៊ុន សហគ្រាសធំៗចំនួន ២៥ កំពុងមានតម្រូវការងារងារជាង ៥ពាន់កន្លែង រង់ចាំទទួលពាក្យស្នើសុំការងារពីសំណាក់យុវជន សិស្ស/និស្សិត និងអ្នកស្វែងរកការងារធ្វើ។
នៅក្នុងពិធីបើកពិព័រណ៍ការងារ និងមគ្គទេស៍អាជីពនេះ ឯកឧត្តម ទុយ ស៊ីផាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ព្រឹត្តការណ៍នេះ គឺជាការអនុវត្តស្របតាមគោលនយោបាយរបស់រាជរដ្ឋាភិបាល ក្នុងការពង្រីកការបើកចំហឱកាសការងារ ដោយជួយបែងចែកឱកាសទាំងនេះឱ្យបានទៅដល់សាធារណជនគ្រប់រូបប្រកបដោយតម្លាភាព និងសមធម៌ សំដៅប្រែក្លាយឱកាសការងារទាំងអស់ទៅជាមុខរបរកាន់តែប្រសើរសម្រាប់ប្រជាពលរដ្ឋគ្រប់រូប។ ឯកឧត្តម បានបន្តថា ការងារនិងអាជីពមួយប្រភេទ មានអត្ថន័យពិសេស សម្រាប់មនុស្សម្នាក់ៗ ដែលបានជ្រើសរើសបំពេញ និងកសាងមាគ៌ាអាជីពនោះ។ ដូច្នេះ យុវជន និងអ្នកស្វែងរកការងារត្រូវការយកចិត្តទុកដាក់រៀបចំផែនការ, ជ្រើសរើសអនុវត្តការងារ, កែសម្រួល និងកសាងអាជីពមួយឲ្យបានពិតប្រាកដ ដើម្បីសំឡឹងឆ្ពោះទៅភាពជោគជ័យក្នុងពេលអនាគត។
លោកស្រី ធូ សុផានី បុគ្គលិកជាន់ខ្ពស់ផ្នែកជ្រើសរើស និងរៀបចំធនធានមនុស្ស នៃធនាគារ អេស៊ីលីដា ភីអិលស៊ី និងលោកស្រី នារី រ័តន៍ បុគ្គលិកផ្នែកធនធានមនុស្សរបស់ក្រុមហ៊ុន អ៊ីអន ខេមបូឌា បាននិយាយស្រដៀងគ្នាថា ក្នុងរយៈពេល២ថ្ងៃនេះនៃកម្មវិធីពិព័រណ៍នេះ ក្រុមហ៊ុនមិនត្រឹមតែនាំយកឱកាសការងារជាច្រើនកន្លែង និងជាច្រើនមុខតំណែងប៉ុណ្ណោះទេ គឺក៏មានកាដូរអនុស្សាវរីយ៍ជាច្រើនផ្តល់ជូនដល់អ្នកចូលរួមផងដែរ។
តំណាងក្រុមហ៊ុនទាំង២នេះ បានអំពាវនាវដល់យុវជន សិស្សនិស្សិត ក៏ដូចជាអ្នកស្វែងរកការងារ អាចចូលរួមទស្សនាដោយសេរី ដើម្បីស្វែងយល់អំពីទីផ្សារការងារ និងដាក់ពាក្យសម្ភាសន៍ការងារភ្លាមៗនៅក្នុងកម្មវិធីមួយនេះ។
កំពុងដើរទស្សនាតាមស្តង់នានា ក្នុងពិព័រណ៍ការងារ និងមគ្គទេស៍អាជីពនេះ កញ្ញា ហ៊ុន សំបូរ ជានិស្សិតឆ្នាំទី១ មកពីវិទ្យាស្ថានជាតិពាណិជ្ជសាស្រ្ត បានបង្ហាញអារម្មណ៍សប្បាយរីករាយ និងលើកឡើងថា កម្មវិធីនេះពិតជាមានសារៈសំខាន់ និងផ្តល់អត្ថប្រយោជន៍ជាច្រើនណាស់ ក្នុងការស្វែងយល់អំពីឱកាសការងារទាំងពេលបច្ចុប្បន្ននិងទៅអនាគត ជាពិសេសទទួលបានបទពិសោធន៍ក្នុងការត្រៀមខ្លួនចូលទីផ្សារការងារ។
សូមបញ្ជាក់ថា ពិព័រណ៍ការងារ និងមគ្គទេស៍អាជីព នឹងត្រូវរៀបចំឡើងរយៈពេល ២ថ្ងៃ គឺថ្ងៃទី៩ និងទី១០ ខែឧសភា នៅអគារ KAMPUS ជាប់ស្ពានអាកាសក្បាលថ្នល់។ ពិព័រណ៍នេះ មានការចូលរួមពីសំណាក់ក្រុមហ៊ុន សហគ្រាសធំៗចំនួន ២៥ ដែលបាននាំយកឱកាសការងារគ្រប់ប្រភេទជាង ៥,៤០០កន្លែង ដើម្បីតាំងបង្ហាញ សម្ភាសជ្រើសរើស និងបើកឱកាសដល់អ្នកដាក់ពាក្យស្នើសុំការងារ ដោយក្នុងនោះមានមុខតំណែងគ្រប់ប្រភេទក្នុងវិស័យធនាគារ និងគ្រឹះស្ថានមីក្រូហិញ្ញវត្ថុ, សេវាកម្ម, អចលនវត្ថុ, ឧស្សាហកម្ម, ការលក់ដុំ និងលក់រាយ, អាហារ និងភេសជ្ជៈជាដើម៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
