ភ្នំពេញ ៖ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារ​សាធារណៈ​នាព្រឹក​ថ្ងៃទី៩ ខែឧសភា ឆ្នាំ២០២៤នេះបានអញ្ជើញជាអធិបតីភាពសម្ភោធសមិទ្ធផលនានា ក្នុង​វត្តសិរីសោភា ហៅវត្តអង្គតាម៉ិញ ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ។

ឯកឧត្តម ហ៊ុន ម៉ានី បានមានប្រសាសន៍ថា សមិទ្ធផល​ដែល​សម្ពោធ​នៅ​ពេល​នេះ​គឺ​កើត​ចេញ​ពី​ការ​ខិតខំ​ប្រឹងប្រែងរបស់សប្បុរសជន និងពុទ្ធបរិស័ទជិតឆ្ងាយ។ ទាំងអស់គ្នាត្រូវចងចាំថា ការ​ដែលអា​ច​ជួបជុំនាំគ្នា កសាងនូវសមិទ្ធផលនៅក្នុងទីនេះបាន គឺដោយសារ​យើង​រស់​នៅ​ក្នុង​ដំបូល​សន្តិភាព ដែលបានផ្ដល់ឱកាសឲ្យយើងជួបជុំគ្នា ធ្វើបុណ្យរួមគ្នាបាន។

ឯកឧត្ដម បានបន្តថា សន្តិភាព ស្ថេរភាពនយោបាយ​បាននាំ​ឲ្យ​មាន​ឱកាស​ក្នុង​ការ​អភិវឌ្ឍ​ប្រទេស​ជាតិ​ឲ្យ​រីក​ចម្រើន ជាមួយនឹងការធ្វើឲ្យប្រទេសជាតិមានឈ្មោះបោះសំឡេងនៅលើឆាកអន្តរជាតិ តាមរយៈ​កម្ពុជាធ្វើជាម្ចាស់ផ្ទះនៃកិច្ចប្រជុំកំពូលធំៗ ដែលមានទាំងថ្នាក់​ដឹកនាំ​កំពូលៗ​នៃ​ប្រទេស​មហា​អំណាច​នៅលើពិភពលោក ក៏បានមកចូលរួមប្រជុំដល់កម្ពុជា ហើយកម្ពុជារក្សា​បាន​នូវ​សន្តិសុខ​ពេញ​លេញ សម្រាប់ថ្នាក់ដឹកនាំទាំងនោះផងដែរ។ កត្តាសុខសន្តិភាពទាំងនេះ គឺបាន​មក​ពី​សម្ដេច​អគ្គមហាសេនាបតីតេជោ ហ៊ុន សែន ដោយសម្ដេចបានប្ដូរជីវិតចំពោះជាតិតាំងពីឆ្នាំ ១៩៧៧ រហូតទទួលបានសន្តិភាពពេញលេញនៅទូទាំងប្រទេសនៅឆ្នាំ ១៩៩៨។

ក្នុងឱកាសនោះដែរ ឯកឧត្តម ហ៊ុន ម៉ានី ក៏សូមឲ្យប្រជាពលរដ្ឋ មហាជន សិស្ស និស្សិតទាំងអស់ រួម​គ្នា​គាំទ្រ ការអនុវត្តគម្រោងជីកព្រែកហ្វូណន-តេជោ ក្រោមការដឹកនាំរបស់សម្ដេចតេជោ ហ៊ុន សែន និងសម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី ដើម្បីឲ្យគម្រោងនេះ​សម្រេច​បាន​ជោគជ័យ សម្រាប់ជា​ផលប្រយោជន៍ជាតិ និងប្រជាជនកម្ពុជា។

ឯកឧត្ដម ឃួង ស្រេង អភិបាលរាជធានីភ្នំពេញ ក៏មានប្រសាសន៍លើក​ឡើង​ពី​ប្រវត្តិ​នៃ​វត្ត​អង្គតា​ម៉ិញ ដោយឯកឧត្ដមបញ្ជាក់ថា៖ ទីតាំងវត្តអង្គតាមិញ ពីមុនជាវាលស្រែ ដែលម្ចាស់ដីស្រែនោះ ឈ្មោះ​​លោកតាម៉ិញ។ តាម៉ិញ​គាត់​បាន​ប្រគល់​ដី​នេះ​ជូន​ព្រះសង្ឃ​ហើយ​ព្រះ​សង្ឃ​ក៏​បាន​សម្រេច​ដាក់​ឈ្មោះ​វត្ត​នេះជាអង្គតាម៉ិញ ក្នុងឆ្នាំ១៨៩៨។ បច្ចុប្បន្ន វត្តអង្គតាម៉ិញ បានប្រើឈ្មោះ​មួយ​ទៀត​ គឺវត្តគោកចំបក់។ ការដាក់ឈ្មោះវត្តគោកចំបក់នេះ ដោយសារ​ទីវត្ត​អារាម​នេះមា​ន​ដើម​ចំ​បក់​ដ៏ធំមួយ។ វត្តអង្គតាម៉ិញ គិតមកដល់ពេលនេះមានអាយុកាល១២៦ឆ្នាំហើយ ជាវត្តមាន​បារមី​ស័ក្ក​សិទ្ធ​​ដែលធ្វើឲ្យពុទ្ធបរិស័ទ និងប្រជាពលរដ្ឋមានជំនឿជឿជាក់យ៉ាងខ្លាំងផងដែរ។

ឯកឧត្ដមបានបន្ថែមទៀតថា៖ ចំពោះសមិទ្ធផលដែលសម្ពោធដាក់ឲ្យប្រើប្រាស់នាពេលនេះ មាន​ដូច​ជា​ការកសាងប្រាសាទ ការពង្រីកសាលាធម្មសភា ការកសាងព្រះពុទ្ធរូបអង្គធំកម្ពស់១៥ ម៉ែត្រ​មួយ​អង្គជាមួយនឹងព្រះពុទ្ធរូបតូចៗចំនួន១៤អង្គ គំនូរ និងសមិទ្ធផលផ្សេងៗទៀត ដែល​សរុប​ជា​ទឹក​ប្រាក់​ប្រមាណ ៣០ម៉ឺនដុល្លារសហរដ្ឋអាមេរិក៕ អត្ថបទ ៖ ប្រាក់ វ៉ាន់ដា