ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បាន​បង្ហាញ​ការ​ប្ដេជ្ញា​ចិត្ត​ថា ក្រសួងនឹងបន្តការបណ្ដុះបណ្ដាលជំនាញសង្គមកិច្ច រហូតដល់មន្ត្រីសង្គម​កិច្ច​ថ្នាក់​ក្រោម​ជាតិ ក៏ដូចជាមន្ត្រីមូលដ្ឋានទាំងអស់ ដើម្បី​ការ​បំពេញកា​រងារជូ​ន​ប្រជាពលរដ្ឋ​កាន់​តែ​មាន​ប្រសិទ្ធភា​ព។ ឯកឧត្តមលើកឡើងបែបនេះក្នុងឱកាសបិទវគ្គបណ្ដុះបណ្ដាល ជំនាញសង្គមកិច្ច ជូន​ថ្នាក់ដឹកនាំជាន់ខ្ពស់នៃក្រសួងសង្គមកិច្ច អតីតយុទ្ធជន និងយុវនីតិសម្បទា។

ឯកឧត្តម ជា សុមេធី បានថ្លែងថាជាគោលដៅក្នុងការបង្កើនប្រសិទ្ធភាពការងារ ក្នុងការ​បម្រើ​សេវា​ជូន​ប្រជាពលរដ្ឋ ពិសេសពលរដ្ឋរងគ្រោះ និងងាយរងគ្រោះ ក្រសួងសង្គមកិច្ច បានចាប់​ផ្ដើម​ដំបូង​ពី​ការ​បណ្ដុះបណ្ដាល ជំនាញសង្គមកិច្ច ជូនថ្នាក់ដឹកនាំជាន់ខ្ពស់នៃក្រសួងសង្គមកិច្ច។ ហើយ​គោល​ដៅ​បន្ទាប់ ក្រសួងនឹងពង្រីក​ការ​បណ្ដុះ​បណ្ដាល​ជំនាញ​សង្គម​កិច្ច​ទៅ​កាន់​មន្ត្រី​សង្គម​កិច្ច​ថ្នាក់​ក្រោម​ជាតិ ក៏ដូចជាមន្ត្រីមូលដ្ឋានដែលជាអ្នកអនុវត្តការងារផ្ទាល់ជាមួយប្រជាពលរដ្ឋ។

ឯកឧត្តម​លើកឡើងថា វិទ្យាស្ថានជាតិសង្គមកិច្ច ត្រូវបន្តរៀប​ចំ​ឱ្យ​មាន​វគ្គ​បណ្ដុះបណ្ដាល​បន្ថែម​ទៀត​ដល់​មន្ត្រី​សង្គមកិច្ចទាំងអស់ ទាំងនៅថ្នាក់ជាតិ និងថ្នាក់ក្រោមជាតិ និងមន្ត្រីមូលដ្ឋាន​ដែល​ជា​តួអង្គអ​នុវត្តផ្ទាល់ក្នុងការផ្ដល់សេវាដល់ប្រជាពលរដ្ឋ។

ក្នុងឱកសនោះឯកឧត្តម រដ្ឋមន្ត្រីបានជំរុញឱ្យពង្រីកវិសាលភាពបណ្តុះបណ្តាល លើកកម្ពស់​គុណភាព និងសមត្ថភាពរបស់និស្សិត បង្កើនការផ្សព្វផ្សាយ អំពីវិទ្យាស្ថាន​ឱ្យ​បាន​ទូលំ​ទូលាយ​បន្ថែម​ទៀត ដើម្បីកំណើនចំនួននិស្សិតប្រចាំឆ្នាំ និងប្រែក្លាយ​ធន​ធាន​ទាំង​​នេះ​ជា​អ្នក​សង្គម​កិច្ច​អាជីព សម្រាប់តម្រូវការរបស់វិស័យសង្គមកិច្ច ទាំងក្នុង ផ្នែកសាធារណៈ ទាំងផ្នែកឯកជន និង​អង្គ​ការ​ក្រៅរដ្ឋាភិបាល ។

ក្នុងពិធីបិទវគ្គបណ្ដុះបណ្ដាលខាងលើនេះ លោក វង្ស ភារៈ នាយករងទទួលបន្ទុកក្ដាប់រួម វិទ្យាស្ថានជាតិសង្គមកិច្ច លើកឡើងដែរថា ការបណ្តុះបណ្តាលជំនាញសង្គមកិច្ច នាពេលនេះ ក៏ដូច​ជាពេលខាងមុខ ធ្វើឡើងក្នុងគោលបំណងធំចំនួន ២។ គោលបំណងទី ១ គឺដើម្បីឆ្លើយ​តប​ទៅ​នឹង​អនុសាសន៍របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណា ចក្រ​កម្ពុជា ដែល សម្តេច បានណែនាំឲ្យក្រសួងសង្គមកិច្ច រៀបចំ​បណ្តុះ​បណ្តាល​ពង្រឹង​សមត្ថភាព​មន្ត្រី​គ្រប់លំដាប់ ថ្នាក់ បង្កើនចំនួន និង ទទួលស្គាល់កម្លាំងសេវាសង្គមកិច្ច ព្រមជាមួយ​នឹ​ង​ការរៀបចំផែនការពង្រាយកម្លាំងសេវា សង្គមកិច្ច ទាំងនៅកម្រិតថ្នាក់ជាតិ និងថ្នាក់ក្រោមជាតិ ។

គោលបំណងទី ២ គឺដើម្បីផ្តល់ជូនដល់ថ្នាក់ដឹកនាំជាន់ខ្ពស់នូវការ ស្វែងយល់បន្ថែមអំពីអ្វី ជា​មូលដ្ឋាន​គ្រឹះ​នៃការងារសង្គមកិច្ច សម្រាប់យកធ្វើជាមូលដ្ឋានសម្រេចចិត្ត ក្នុងការ អភិវឌ្ឍវិស័យ​សង្គម​កិច្ច ឲ្យកាន់តែរីកចម្រើននិងមានប្រសិទ្ធភាព ឆ្លើយតបនឹង​តម្រូវ​ការ​ជាក់​ស្តែង​របស់​ជន​រងគ្រោះ និងងាយរងគ្រោះ៕ អត្ថបទ៖គឹមហុក