នាយករដ្ឋមន្រ្តីលោក Narendra Modi កំពុងធ្វើដំណើរឆ្លងកាត់ប្រទេសឥណ្ឌាពីកន្លែងមួយទៅកន្លែងមួយ ក្នុងយុទ្ធនាការបោះឆ្នោតរយៈពេលយូរ ប៉ុន្តែជាលើកដំបូង គិតចាប់តាំងពីឆ្នាំ១៩៩៦ មក គណបក្ស Bharatiya Janata Party (BJP) របស់លោក មិនចូលរួមប្រកួតប្រជែង នៅតំបន់ Kashmir ជាកន្លែងដែលការបះបោររយៈពេល ៣៥ឆ្នាំ ប្រឆាំងនឹងការគ្រប់គ្រងរបស់ឥណ្ឌា បានសម្លាប់មនុស្សរាប់ម៉ឺននាក់។

ផ្ទុយទៅវិញ គណបក្សនៅមូលដ្ឋានដ៏មានឥទ្ធិពលចំនួន២ គឺគណបក្សសន្និសីទជាតិ និងគណបក្សប្រជាធិបតេយ្យប្រជាជន (PDP) ក្លាយជាគូប្រជែងដ៏ធំ ដើម្បីដណ្ដើមអាសនៈចំនួន៣ នៅក្នុងតំបន់ដែលមានអ្នកកាន់សាសនាឥស្លាមភាគច្រើនមួយនេះ។ គណបក្សទាំង២ នឹងប្រជែងគ្នា ប៉ុន្តែពួកគេនិយាយដូចគ្នាថា ពួកគេប្រឆាំងនឹងគណបក្សជាតិនិយមហិណ្ឌូ BJP ហើយនឹងសម្របជាមួយសម្ព័ន្ធភាពក្រុមប្រឆាំង ដែលដឹកនាំដោយគណបក្ស Congress។

អ្នកវិភាគ និងគណបក្សប្រឆាំង និយាយថា គណបក្ស BJP បានសម្រេចចិត្តមិនចូលរួមប្រកួតប្រជែងការបោះឆ្នោតនៅតំបន់នេះ ដោយសារតែលទ្ធផលទំនងជាផ្ទុយនឹងការនិទានរឿងរបស់លោក Modi អំពីការមានសន្តិភាពនៅតំបន់ Kashmir និងការនិយាយពីការធ្វើសមាហរណកម្មកាន់តែច្រើនឡើង គិតចាប់តាំងពីរូបលោកបានលុបចោលឋានៈពាក់កណ្តាលស្វយ័ត ក្នុងតំបន់នេះ កាលពីឆ្នាំ២០១៩ ហើយបានយកតំបន់នេះឲ្យស្ថិតនៅក្រោមការគ្រប់គ្រងរបស់ទីក្រុង New Delhi។

សូមបញ្ជាក់ថា គណបក្ស BJP រួមជាមួយនឹងសម្ព័ន្ធមិត្ត កំពុងប្រកួតប្រជែងនៅគ្រប់ផ្នែកផ្សេងទៀតនៃប្រទេសឥណ្ឌា ហើយត្រូវបានគេរំពឹងថា នឹងឈ្នះកៅអីភាគច្រើន ក្នុចំណោម ៥៤៣អាសនៈរបស់សភា ដោយសារការគាំទ្រដល់ពួកហិណ្ឌូជាចម្បងរបស់ខ្លួន។

យ៉ាងណាក្ដី ពាក់ព័ន្ធនឹងតំបន់ Kashmir នេះ លោក Modi និយាយថា ការសម្រេចចិត្តឆ្នាំ២០១៩ របស់លោក បាននាំឲ្យតំបន់នេះមានភាពប្រក្រតីឡើងវិញ បន្ទាប់ពីមានការបង្ហូរឈាមជាច្រើនទសវត្សរ៍ ហើយថា លោកនឹងនាំមកនូវការវិនិយោគ និងការងារ ក្នុងពេលឆាប់ៗនេះ៕