សង្គ្រាមនៅតំបន់ហ្កាហ្សា បានធ្វើឲ្យសកម្មភាពអាជីវកម្មរបស់អ៊ីស្រាអែលជាមួយអារ៉ាប់រួម ធ្លាក់ចុះយ៉ាងខ្លាំង ដោយទំនាក់ទំនងដែលធ្លាប់តែមានភាពល្អប្រសើរ ឥឡូវនេះ បាននៅឃ្លាតឆ្ងាយពីគ្នា ចំពេលមានកំហឹងនៅក្នុងពិភពអារ៉ាប់ជុំវិញជម្លោះនេះ។

ប្រទេសអារ៉ាប់រួម បានក្លាយជារដ្ឋអារ៉ាប់លេចធ្លោបំផុតក្នុងរយៈពេល ៣០ឆ្នាំ ដើម្បីបង្កើតទំនាក់ទំនងផ្លូវការជាមួយអ៊ីស្រាអែល ក្រោមកិច្ចព្រមព្រៀងដែលសម្រួបសម្រួលដោយសហរដ្ឋអាមេរិក ក្នុងឆ្នាំ ២០២០ ដែលមានឈ្មោះថា Abraham Accords ។ ប្រទេសនេះ បានរក្សាទំនាក់ទំនងនេះក្នុងអំឡុងសង្រ្គាមរយៈពេលជាង ៦ខែរបស់អ៊ីស្រាអែល នៅតំបន់ហ្កាហ្សា។

បន្ទាប់ពីកិច្ចព្រមព្រៀងនេះ សហគ្រិនអ៊ីស្រាអែល បានចាប់ផ្តើមសម្រុកទៅកាន់រដ្ឋឈូងសមុទ្រដោយមាន ជើងហោះហើរត្រង់ពីទីក្រុងតែលអាវីវ ( Tel Aviv) បង្កើតទំនាក់ទំនងអាជីវកម្មថ្មី និងពង្រីកទំនាក់ទំនងដែលមានស្រាប់ និងធ្លាប់បានរក្សាការសម្ងាត់។ កិច្ចព្រមព្រៀងដែលបានប្រកាសមុនពេលសង្រ្គាមរួមមានការវិនិយោគលើសន្តិសុខអ៊ីនធឺណិត បច្ចេកវិទ្យា Fintech ថាមពល និងបច្ចេកវិទ្យាកសិកម្ម។

មន្ត្រីអ៊ីស្រាអែល នាយកប្រតិបត្តិ និងសហគ្រិនចំនួន ១០រូប បានប្រាប់សារព័ត៌មានរ៉យទ័រថា ទំនាក់ទំនងពាណិជ្ជកម្មជាមួយរដ្ឋឈូងសមុទ្រដ៏មានឥទ្ធិពល នៅតែរក្សាដដែល ប៉ុន្តែជាសញ្ញាមួយបង្ហាញពីរបៀបដែលជម្លោះ បានរារាំងភាពរីកចម្រើន ពួកគេបានបដិសេធមិនពិភាក្សាអំពីកិច្ចព្រមព្រៀងថ្មីៗណាមួយ   ឡើយ។

លោក Raphael Nagel សហគ្រិនជនជាតិជ្វីហ្វអាល្លឺម៉ង់រស់នៅក្នុងប្រទេសអារ៉ាប់រង ដែលដឹកនាំក្រុមធុរកិច្ចឯកជនដែលលើកកម្ពស់ទំនាក់ទំនងអាជីវកម្មរវាងអ៊ីស្រាអែល និងរដ្ឋឈូងសមុទ្រអារ៉ាប់ បាននិយាយថា៖«វានៅតែកើតឡើង។ វាកើតឡើងតិចជាង វាតិចជាងមុន នៅលើមុខរបស់យើង»។