ប្រធានាធិបតីកូរ៉េខាងត្បូង លោក Yoon Suk Yeol បាននិយាយកាលពីថ្ងៃព្រហស្បតិ៍នេះថា ទីក្រុងសេអ៊ូលនឹងរក្សាទំនាក់ទំនងរឹងមាំជាមួយអ៊ុយក្រែន និងទំនាក់ទំនង «ល្អប្រសើរ» ជាមួយរុស្ស៊ី ខណៈពេលដែលបានបដិសេធការនាំចេញអាវុធដោយផ្ទាល់ ទៅកាន់ទីក្រុងគីវ។

ក្នុងនាមជាប្រទេសនាំចេញអាវុធដ៏សំខាន់មួយ ទីក្រុងសេអ៊ូល ត្រូវបានស្នើសុំយូរមកហើយដោយសម្ព័ន្ធមិត្តរបស់សហរដ្ឋអាមេរិក និងអឺរ៉ុប ឲ្យធ្វើបន្ថែមទៀត ដើម្បីជួយទីក្រុងគីវ ដោយមានការរំពឹងទុកថា កូរ៉េខាងត្បូង នឹងផ្លាស់ប្តូរគោលនយោបាយយូរអង្វែង ដោយសារតែការបញ្ជូនអាវុធរបស់កូរ៉េខាងជើង ទៅកាន់ប្រទេសរុស្ស៊ីសម្រាប់ប្រើប្រាស់ក្នុងប្រទេសអ៊ុយក្រែន។

ប៉ុន្តែ លោក Yoon បានថ្លែងប្រាប់អ្នកយកព័ត៌មានថា វាគឺជា «ជំហរដ៏រឹងមាំ» របស់លោកដែលមិនផ្តល់អាវុធដ៍សម្លាប់មនុស្សដល់ប្រទេសដែលកំពុងមានជម្លោះនេះ។

លោក Yoon ក៏បានបញ្ជាក់ថា ប្រទេសរបស់លោកកំពុងធ្វើ «ឲ្យអស់ពីសមត្ថភាព ដើម្បីផ្តល់ជំនួយមនុស្សធម៌ និងការកសាងឡើងវិញ ស្របតាមស្មារតីនៃរដ្ឋធម្មនុញ្ញ»។

លោក Yoon បានបន្តទៀតថា ទំនាក់ទំនងរបស់ប្រទេសលោកជាមួយទីក្រុងមូស្គូ ត្រូវបានតានតឹងដោយសារអ្វីដែលទីក្រុងសេអ៊ូល និងសម្ព័ន្ធមិត្តក្រុងវ៉ាស៊ីនតោន និយាយថា ជាការបញ្ជូនអាវុធពីកូរ៉េខាងជើងទៅកាន់ប្រទេសរុស្ស៊ី។

លោក Yoon បានសង្កត់ធ្ងន់ថា៖«ការនាំចេញអាវុធវាយលុករបស់កូរ៉េខាងជើងមិនត្រឹមតែគាំទ្រដល់ការធ្វើសង្រ្គាមខុសច្បាប់ទាក់ទងនឹងអ៊ុយក្រែនប៉ុណ្ណោះទេ ថែមទាំងបំពានយ៉ាងច្បាស់នូវសេចក្តីសម្រេចដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិទាក់ទងនឹងអាវុធនុយក្លេអ៊ែររបស់កូរ៉េខាង   ជើង»។

ថ្វីបើមានភាពតានតឹងជាមួយទីក្រុងមូស្គូជុំវិញការនាំចេញអាវុធក៏ដោយ លោក Yoon បាននិយាយថា លោកនឹងធ្វើការជាមួយប្រទេសរុស្ស៊ី។