អត្តពលកម្ម៖ ប្រតិភូ គ្រូបង្វឹក និងអត្តពលិកអូឡាំពិកកម្ពុជា បានធ្វើដំណើរមកដល់មាតុភូមិវិញហើយកាលពីល្ងាចថ្ងៃទី០២ ខែសីហា បន្ទាប់ពីបញ្ចប់បេសកកម្មប្រកួតកីឡាអូឡាំពិកតូក្យូឆ្នាំ២០២០ ក្រោមការដឹកនាំរបស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) និងជានាយបេសកកម្ម។
ប៉ុន្តែអ្វីដែលគួរឲ្យចាប់អារម្មណ៍ ដំណើរមាតុភូមិនិវត្តន៍នេះពុំមានវត្តមានកីឡាករអត្តពលកម្ម ប៉ែន សុគង់ ឡើយ ដ្បិតរូបគេត្រូវបន្ដហ្វឹកហាត់រយៈពេល ៨ខែនៅប្រទេសជប៉ុនរហូតដល់ស៊ីហ្គេមនៅវៀតណាម។ តាមការបញ្ជាក់របស់កីឡាករជំនាញរត់ល្បឿន ១០០ម៉ែត្រនេះបានឲ្យដឹងថា ខ្លួនមិនបានធ្វើដំណើរមកកម្ពុជាជាមួយប្រតិភូ និងអត្តពលិកផ្សេងទៀតនោះទេ ដោយសារខ្លួនជាប់ត្រូវបន្ដហ្វឹកហាត់រយៈពេល ៨ខែនៅប្រទេសជប៉ុនចាប់ពីដើមខែសីហា ឆ្នាំ២០២១ រហូតដល់ដើមខែមេសា ឆ្នាំ២០២២ ដែលការហ្វឹកហាត់នេះធ្វើឡើងក្រោមកិច្ចសហការ រវាងសហព័ន្ធខ្មែរកីឡាអត្តពលកម្ម និងក្លិប UMEOMIRAI ស្ថិតនៅទីក្រុង Kanagawa ដោយរាល់ការចំណាយគឺជាបន្ទុករបស់ភាគីក្លិបនៅជប៉ុននេះផ្ទាល់តែម្ដង។
គួរបញ្ជាក់ថា ប៉ែន សុគង់ គឺជាអត្តពលិកផ្នែកកីឡាអត្តពលកកម្មកម្ពុជាតែ ១រូបគត់ដែលបានជ្រើសរើសចូលរួមប្រកួតកីឡាអូឡាំពិកនាទីក្រុងតូក្យូ លើវិញ្ញាសារត់ល្បឿន ១០០ម៉ែត្រ តែបានធ្លាក់ត្រឹមវគ្គជម្រុះក្រោយបញ្ចប់ក្នុងចំណាត់ថ្នាក់លេខ៦ ក្នុងស៊េរី ដោយប្រើថេរវេលា ១១.០២វិនាទីកាលពីថ្ងៃទី៣១ ខែកក្កដាកន្លងទៅ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
