មន្ត្រីជាន់ខ្ពស់អង្គការសហប្រជាជាតិមួយរូប បានព្រមានកាលពីថ្ងៃព្រហស្បតិ៍ (០៩ ឧសភា) ថា ការបិទច្រកសំខាន់ៗរបស់អ៊ីស្រាអែល ទៅកាន់តំបន់ហ្កាហ្សា បានកាត់ផ្តាច់ច្រកចូលសំខាន់សម្រាប់ជំនួយ និងជាពិសេសប្រេងឥន្ធនៈ ដែលធ្វើឱ្យប្រតិបត្តិការមនុស្សធម៌ទាំងអស់មិនអាចទៅរួច។

អ៊ីស្រាអែល កាលពីថ្ងៃអាទិត្យ បានបិទច្រក កេរឹម សាលូម (Kerem Shalom) ដ៏សំខាន់រវាងអ៊ីស្រាអែល និងភាគខាងត្បូងហ្កាហ្សា ដែលជំនួយមនុស្សធម៌ភាគច្រើនចូលទៅក្នុងទឹកដីប៉ាឡេស្ទីនតាមរយៈនោះ បន្ទាប់ពីការវាយប្រហារដោយមីស៊ីលរបស់ក្រុមហាម៉ាស បានសម្លាប់ទាហានអ៊ីស្រាអែលបួននាក់នៅក្នុងតំបន់នោះ។

លោក អាន់ឌ្រា ដឺ ដូមេនីកូ (Andrea De Domenico) ប្រធានការិយាល័យមនុស្សធម៌របស់អង្គការសហប្រជាជាតិ OCHA នៅក្នុងតំបន់កាន់កាប់ប៉ាឡេស្ទីនបាននិយាយថា «យើងបានបាត់បង់ចំណុចសំខាន់សម្រាប់ជំនួយមនុស្សធម៌ទាំងអស់»។ កាលពីថ្ងៃអង្គារ កងទ័ពអ៊ីស្រាអែលបានឡោមព័ទ្ធ និងបិទច្រកព្រំដែនរ៉ាហ្វា (Rafah) ខាងភាគីប៉ាឡេស្ទីន បន្ទាប់ពីបានបញ្ជាឱ្យប្រជាជននៅភាគខាងកើតក្រុង រ៉ាហ្វា ជម្លៀសចេញ។

សូម្បីតែមុនពេលច្រករ៉ាហ្វា ត្រូវបានបិទក៏ដោយ លោក ដូមេនីកូ និយាយថា អង្គការសហប្រជាជាតិ បានជំរុញឱ្យមានមធ្យោបាយជំនួសដើម្បីនាំយកឥន្ធនៈចូលទៅក្នុងទឹកដីហ៊ុមព័ទ្ធនេះ ស្របពេលមានការព្រួយបារម្ភអំពីការគំរាមកំហែងរបស់អ៊ីស្រាអែល ក្នុងការបើកការវាយប្រហារជើងគោកលើទីក្រុងភាគខាងត្បូង ដែលអង្គការសហប្រជាជាតិនិយាយថាមនុស្ស ១,៤ លាននាក់កំពុងជ្រកកោន៕