បាល់ទាត់៖ គណៈកម្មការប្រកួតបាល់ទាត់ជាតិកម្ពុជា (CNCC) បានប្រកាសពន្យារពេលការប្រកួតពានរង្វាន់សម្ដេចតេជោ ហ៊ុន សែន (ថ្នាក់ខេត្ត) និងលីគកំពូលកម្ពុជាឆ្នាំ២០២១ ជាបណ្ដោះអាសន្នរហូតដល់ថ្ងៃទី១២ ខែសីហា បន្ទាប់ពីមានការរីករាលដាលខ្លាំងនៃជំងឺកូវីដ-១៩ ពិសេសជំងឺបំប្លែងថ្មីប្រភេទដែលតា (Delta) ដែលទើបផ្ទុះការរីករាលដាលក្នុងសហគមន៍កាលពីថ្មីៗ។
យោងតាមសេចក្ដីជូនដំណឹងរបស់ CNCC កាលពីល្ងាចថ្ងៃទី២ ខែសីហា ដោយឆ្លើយតបជាមួយសេចក្ដីសម្រេចរបស់រាជរដ្ឋាភិបាល និងសេចក្ដីសម្រេចរបស់រដ្ឋបាលរាជធានីភ្នំពេញ ក៏ដូចជាដើម្បីចូលរួមបង្ការ និងទប់ស្កាត់ការឆ្លងរីករាលដាលក្នុងសហគមន៍នៃមេរោគកូវីដ-១៩ ប្រភេទដែលតា (Delta) CNCC បានសម្រេចពន្យារពេលការប្រកួតពានរង្វាន់ទាំងពីររហូតដល់ថ្ងៃទី១២ ខែសីហា ឆ្នាំ២០២១ ជាបណ្ដោះអាសន្ន។ ចំពោះកាលបរិច្ឆេទថ្មី CNCC នឹងជូនដំណឹងតាមក្រោយ។ គួរដឹងថា ការសម្រេចផ្អាកការប្រកួតបណ្ដោះអាសន្នជាថ្មីនេះ បន្ទាប់ពីរាជរដ្ឋាភិបាលបានសម្រេចបិទខ្ទប់ខេត្តមួយចំនួន ក៏ដូចជារាជធានីភ្នំពេញដែលបានដាក់ចេញនូវបំរាមគោលចរ និងបិទខ្ទប់តំបន់មួយចំនួនបន្ទាប់ពីផ្ទុះជំងឺកូវីដ-១៩ ប្រភេទថ្មី Delta ក្នុងសហគមន៍។
ដំបូងឡើយពានសម្ដេចតេជោ ហ៊ុន សែន ថ្នាក់ខេត្ត គ្រោងបន្ដការប្រកួតនៅថ្ងៃទី០៣ ខែសីហានេះ តែដោយយោងតាមសេចក្ដីសម្រេចរបស់រាជរដ្ឋាភិបាល និងសេចក្ដីសម្រេចរបស់រដ្ឋបាលរាជធានីភ្នំពេញ CNCC ក៏សម្រេចពន្យារពេលជាបន្ដ។ ចំណែកលីគកំពូលកម្ពុជាបានដំណើរការប្រកួតចំនួន ១១សប្ដាហ៍មកហើយ ពោលគឺនៅសល់តែ ២សប្ដាហ៍ទៀតប៉ុណ្ណោះ នឹងបញ្ចប់ការប្រកួតសន្សំពិន្ទុជើងទី១ មុន CNCC ប្រកាសពន្យារពេលការប្រកួតពេលនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
