ប្រតិភូរាជរដ្ឋាភិបាលទទួលបន្ទុកអគ្គនាយកស៊ីម៉ាក់ ឯកឧត្ដម ហេង រតនា នៅថ្ងៃទី១០ ខែឧសភា ឆ្នាំ២០២៤នេះ បាននាំយកព្រះរាជអំណោយដ៏ថ្លៃថ្លាបំផុតរបស់ព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេច​ព្រះមហា​ក្សត្រី ព្រះវររាជមាតាជាតិ ប្រគល់ដល់មន្រ្តីបុគ្គលិក កម្លាំងប្រតិបត្តិការរបស់អង្គភាព CMAC ដែល​កំពុង​បំពេញ​ប្រតិបត្តិការ នៅកងឯកភាពកំចាត់មីនទី៤ និងកងឯកភាពកំចាត់មីនទី៦ សរុប​ចំនួន​៥៣២នាក់​។ ការប្រគល់អណោយនេះ ធ្វើឡើងនៅសារមន្ទីរតេជោសន្តិភាព ខេត្តសៀមរាប នាព្រឹកថ្ងៃទី១០ ខែឧសភា ឆ្នាំ២០២៤នេះ។

ឯកឧត្ដម ហេង រតនា ប្រតិភូរាជរដ្ឋាភិបាល ទទួលបន្ទុកអគ្គនាយកមជ្ឍមណ្ឌល​សកម្មភាព​កំចាត់​មីន​កម្ពុជា បានថ្លែងថា ទូលព្រះបង្គំជាខ្ញុំទាំងអស់គ្នា សូមថ្លែងអំណរព្រះរាជគុណដ៏ខ្ពង់ខ្ពស់បំផុត និង​សូម​ឧទ្ទិសបួងសួងចំពោះគុណបុណ្យព្រះរតនត្រ័យវត្ថុស័ក្តិសិទ្ធិក្នុងលោក សូមប្រ​សិទ្ធ​ពរ​ជ័យ​សិរី​មង្គល​វិបុលសុខ បវរមហាប្រសើរថ្វាយ ព្រះករុណាជាអម្ចាស់ជីវិតលើត្បូង ជាទីគោរព​សក្ការៈ​ដ៏ខ្ពង់​ខ្ពស់​បំផុត និង សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរព​សក្ការៈ​ដ៏​ខ្ពង់​ខ្ពស់​បំផុត​ សូមព្រះអង្គទាំងទ្វេ ប្រកបដោយព្រះបរមសុខគ្រប់ប្រការ ព្រះរាជសុខភាពល្អបរិបូណ៌ ព្រះកាយ​ពល​មាំមួន និងមានព្រះជន្មាយុយឺនយូរជាងរយព្រះវស្សា ដើម្បីគង់​ប្រថាប់​នៅ​ជា​ម្លប់​ដ៏​ត្រជាក់​ត្រជុំ​ដល់កូនចៅ ចៅទួតរបស់ព្រះអង្គទូទាំងព្រះរាជាណាចក្រកម្ពុជា តរៀងទៅ។ ព្រះរាជ​អំណោយ​ដ៏​ថ្លៃថ្លាបំផុតនេះបានជួយសម្រាលនូវការលំបាក ក៏ដូចជាការលើក​ទឹកចិត្ត​ខ្ពស់​បំផុត​ដល់​កង​កម្លាំង​ដោះមីនទាំងអស់ ព្រមទាំងជំរុញឲ្យទូល​ព្រះបង្គំ​ទាំង​អស់​គ្នា​កាន់​តែ​ខិត​ខំ​ប្រឹង​ប្រែង​បំពេញ​ភារកិច្ចរបស់ខ្លួនក្នុងកិច្ចប្រតិបត្តិការបោសសម្អាតគ្រាប់មីន និងគ្រាប់យុទ្ធភណ្ឌ​មិន​ទាន់​ផ្ទុះ​ឱ្យ​កាន់​តែ​ខ្លាំង​កា្លថែមទៀត៕