នៅវិមានក្នុងប្រទេសក្រូអាត និងប៊ុលហ្គារី បានបើកភ្លើងបំភ្លឺពណ៌របស់សហភាពអឺរ៉ុប (EU) កាលពីថ្ងៃពុធ និងថ្ងៃព្រហស្បតិ៍ ដើម្បីប្រារព្ធទិវាអឺរ៉ុប និងជំរុញទឹកចិត្តដល់ពលរដ្ឋឱ្យចូលរួមក្នុងការបោះឆ្នោតសភាសហភាពអឺរ៉ុប នាពេលខាងមុខ នៅក្នុងខែមិថុនា។ ចាប់ពីថ្ងៃទី ៦ ដល់ថ្ងៃទី ៩ ខែមិថុនា ប្រជាជនសហភាពអឺរ៉ុប នឹងជ្រើសរើសសមាជិកថ្មីរបស់សភាអឺរ៉ុបចំនួន៧២០រូប សម្រាប់រយៈពេលប្រាំឆ្នាំ។

ជាមួយគ្នានេះ ទីតាំងសំខាន់ៗ និងវិមានដ៏ល្បីល្បាញ ដូចជា អាក ដេ ទ្រីអូមហ្វេ(Arc de Triomphe) ក្នុងទីក្រុងប៉ារីសប្រទេសបារាំង ស្ពានSamuel Beckett ក្នុងទីក្រុង Dublin ប្រទេសអៀកឡង់ និងវិមាន Hofburg ក្នុងទីក្រុងវីយែនប្រទេសអូទ្រីស បានបើកភ្លើងពណ៌បំភ្លឺ មួយខែមុនការបោះឆ្នោតសភាសហភាពអឺរ៉ុប។

អគារមួយចំនួនផ្សេងទៀតដែលបំភ្លឺដោយភ្លើងពណ៌ ជាពណ៌របស់សហភាពអឺរ៉ុប មានទីក្រុង Brussels ប្រទេសប៊ែលហ្ស៊ីក និង Vilnius ប្រទេសលីទុយអានី នៅក្នុងទីក្រុងប្រទេសម៉ាល់តា និងក្នុងទីក្រុងមីឡាន ប្រទេសអ៊ីតាលី។

ការបោះឆ្នោតសភាសហភាពអឺរ៉ុប នឹងប្រព្រឹត្តទៅនៅទូទាំងសហភាពអឺរ៉ុប ចាប់ពីថ្ងៃព្រហស្បតិ៍ទី៦ ខែមិថុនា ដល់ថ្ងៃអាទិត្យទី៩ ខែមិថុនា។

ទង់ជាតិសហភាពអ៊ឺរ៉ុប ដែលមានផ្កាយពណ៌លឿងចំនួន១២ ត្រូវបានដាក់នៅលើផ្នែកខាងមុខនៃនិមិត្តសញ្ញាសហភាពអឺរ៉ុប។