សេតវិមានបាននិយាយកាលពីថ្ងៃព្រហស្បតិ៍ (០៩ ឧសភា) ថា ប្រធានាធិបតីអាមេរិក លោក ចូ បៃដិន (Joe Biden) ជឿជាក់ថាប្រតិបត្តិការទ្រង់ទ្រាយធំណាមួយលើក្រុងរ៉ាហ្វា (Rafah) ធ្វើឡើងដោយអ៊ីស្រាអែល នឹងមិនអាចជំរុញគោលបំណងរបស់ប្រទេសនេះក្នុងការកម្ចាត់ក្រុមសកម្មប្រយុទ្ធប៉ាឡេស្ទីនហាម៉ាស នៅក្នុងតំបន់ហ្កាហ្សា បាននោះឡើយ។

អ្នកនាំពាក្យលោក ចន ឃឺបប៊ី (John Kirby) បាននិយាយក្នុងបទសម្ភាសន៍ខ្លីមួយថា៖ «តាមទស្សនៈរបស់លោកប្រធានាធិបតីអាមេរិក ការវាយកម្ទេចក្រុងរ៉ាហ្វា នឹងមិនឈានដល់គោលដៅរបស់អ៊ីស្រាអែល នោះទេ។ ក្រុមហាម៉ាស ត្រូវបានដាក់សម្ពាធយ៉ាងខ្លាំងដោយអ៊ីស្រាអែល ហើយឥឡូវនេះមានវិធីប្រសើរជាងមុនដើម្បីលុបបំបាត់ក្រុមនេះ ជាជាងប្រតិបត្តិការដែលមានហានិភ័យយ៉ាងធ្ងន់ធ្ងរដល់ជនស៊ីវិល»។

លោក ឃឺបប៊ី បន្ថែមថា ការពិគ្រោះយោបល់រវាងសហរដ្ឋអាមេរិក និងអ៊ីស្រាអែល កំពុងបន្តអំពីជម្រើសផ្សេងសម្រាប់ប្រតិបត្តិការមូលដ្ឋានដ៏សំខាន់មួយនៅក្រុងរ៉ាហ្វា។ លោកប្រធានាធិបតី ចូ បៃដិន (Joe Biden) បានព្រមានអ៊ីស្រាអែល ជាសាធារណៈជាលើកដំបូងថា សហរដ្ឋអាមេរិក នឹងឈប់ផ្គត់ផ្គង់អាវុធឱ្យខ្លួន ប្រសិនបើកងកម្លាំងអ៊ីស្រាអែល ធ្វើការលុកលុយទ្រង់ទ្រាយធំលើក្រុងរ៉ាហ្វា។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ប្រឈមមុខនឹងសម្ពាធយ៉ាងខ្លាំងក្លាទាំងក្នុង និងក្រៅប្រទេស នៅពេលដែលលោកកំពុងថ្លឹងថ្លែងថា តើត្រូវជំរុញប្រតិបត្តិការកម្ចាត់ក្រុមហាម៉ាស នៅក្រុងរ៉ាហ្វា ឬយ៉ាងណា ដែលធ្វើអោយមានភាពស្មុគស្មាញដល់ក្តីសង្ឃឹមក្នុងការនាំយកចំណាប់ថ្នូរអ៊ីស្រាអែលត្រឡប់មកវិញ៕