មហាសន្និបាតអង្គការសហប្រជាជាតិ នៅថ្ងៃសុក្រ (១០ ឧសភា) នេះគ្រោងនឹងគាំទ្រសំណើរបស់ប៉ាឡេស្ទីន ដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិ ដោយទទួលស្គាល់ថាប៉ាឡេស្ទីន មានលក្ខណៈសម្បត្តិគ្រប់គ្រាន់ក្នុងការចូលរួម ហើយបញ្ជូនពាក្យស្នើសុំនេះត្រឡប់ទៅក្រុមប្រឹក្សាសន្តិសុខអង្គការសហប្រជាជាតិវិញ ដើម្បី «ពិចារណាឡើងវិញដោយអនុគ្រោះ»។

ប៉ាឡេស្ទីន កំពុងជំរុញសំណើដើម្បីក្លាយជាសមាជិកពេញសិទ្ធិរបស់អង្គការសហប្រជាជាតិ ដោយនោះជាវិធានការដែលនឹងទទួលស្គាល់រដ្ឋប៉ាឡេស្ទីនប្រកបដោយប្រសិទ្ធភាព បន្ទាប់ពីសហរដ្ឋអាមេរិក បានបោះឆ្នោតវេតូនៅក្នុងក្រុមប្រឹក្សាសន្តិសុខអង្គការសហប្រជាជាតិ ដែលមានសមាជិក ១៥ រូបកាលពីខែមុន។

ការបោះឆ្នោតដោយមហាសន្និបាតដែលមានសមាជិកចំនួន ១៩៣ រដ្ឋនៅថ្ងៃសុក្រនេះ នឹងដើរតួនាទីជាការស្ទាបស្ទង់មតិសកលអំពីការគាំទ្រដល់ប៉ាឡេស្ទីន។ ពាក្យស្នើសុំក្លាយជាសមាជិកពេញសិទ្ធិរបស់អង្គការសហប្រជាជាតិដំបូងត្រូវមានការយល់ព្រមពីក្រុមប្រឹក្សាសន្តិសុខ ហើយបន្ទាប់មកទៅដល់មហាសន្និបាត។

ប៉ុន្តែខណៈពេលដែលមហាសន្និបាតតែមួយមិនអាចផ្តល់សមាជិកភាពពេញលេញរបស់អង្គការសហប្រជាជាតិដល់ប៉ាឡេស្ទីនបាន ពង្រាងសេចក្តីសម្រេចដែលត្រូវបានដាក់ឱ្យបោះឆ្នោតនៅថ្ងៃសុក្រនេះនឹងផ្តល់ឱ្យប៉ាឡេស្ទីននូវសិទ្ធិ និងឯកសិទ្ធិបន្ថែមមួយចំនួនចាប់ពីខែកញ្ញា ឆ្នាំ២០២៤ ដូចជាមានកៅអីក្នុងចំណោមសមាជិកអង្គការសហប្រជាជាតិនៅក្នុងសាលប្រជុំ ប៉ុន្តែវានឹង មិនត្រូវបានអនុញ្ញាតឱ្យបោះឆ្នោតនៅក្នុងសា្ថប័ននេះឡើយ៕