ក្រសួងអប់រំយុវជន និងកីឡា ប្រកាសហាមលោកគ្រូ អ្នកគ្រូនៅតាមគ្រឹះស្ថានសិក្សា​រដ្ឋបង្ខំ​សិស្ស​ឱ្យ​រៀន​គួរបន្ថែម ខណៈក្រសួងបានសេចក្តីសម្រេចឱ្យ​អនុវត្តកម្ម​វិធី​សិក្សា​ក្រៅម៉ោង​ ២ម៉ោង​បន្ថែម​រួច​ហើយ ដើម្បីផ្តល់តម្លាភាពជូនសិស្សានុសិស្សស្ថិតក្នុងបន្ទុកគ្រួសារក្រីក្រ និងសិស្ស​ទាំងអស់​គ្នា​ឱ្យ​ទទួលបា​នឱកាសសិក្សារៀនសូត្រដូចៗគ្នា។

តាមសេចក្តីថ្លែងការណ៍របស់ក្រសួងក្រសួងអប់រំយុវជន និងកីឡា បានឱ្យដឹងថា បច្ចុប្បន្ននេះ ក្រសួង​បាន​ចេញសេចក្តីណែនាំស្តីពីការ​អនុវត្តកម្ម​វិធី​ក្រៅម៉ោង​សិក្សា​នៅ​តាម​គ្រឹះស្ថាន​បឋម​សិក្សា ​និងមធ្យមសិក្សាសាធារណៈគំរូ ក្នុងគោលដៅបង្កើនម៉ោងសិក្សាយ៉ាងតិច ២ ម៉ោងក្នុង​មួយថ្ងៃ បន្ថែមទៀត ក្រោយពីក្រសួង​បាន​ទទួល​ព័ត៌មាន​អំពី​ការ​ត្អូញត្អែ​របស់​មាតាបិតា​សិស្ស​មួយ​ចំនួន​ពាក់ព័ន្ធ​នឹងការលំបាកក្នុងការរ៉ាប់រងថ្លៃចំណាយលើការរៀនគួរក្រៅម៉ោងបន្ថែមរបស់កូនៗ និង​បានបង្កបាតុភាពអវិជ្ជមាន ពីសកម្មភាពបង្រៀនគួរ ដូចជាការចេញវិញ្ញាសាប្រឡងប្រចាំខែ ប្រចាំ​ឆមាសនូវលំហាត់ ឬខ្លឹមសារ ដូចទៅនឹងការបង្រៀនគួររួច ដែលធ្វើ​ឱ្យ​ប៉ះពាល់​ដល់​សតិ​អារម្មណ៍​របស់​សិស្សមិនបានរៀនគួ និងជាពិសេសបង្កើត​គម្លាត​វិសមភាព​យ៉ាង​ច្រើន​សម្រាប់​កុមារ​ក្រីក្រ​ជួប​ការលំបាក ដែលគ្មានលទ្ធភាពរៀនគួរបន្ថែម។

អ្នកនាំពាក្យក្រសួងអប់រំយុវជន និងកីឡា លោកស្រី ឃួន វិច្ឆិកា ថ្លែងប្រាប់ BTV នៅថ្ងៃទី១០ ខែ​ឧសភានេះ ថា នៅពេលនេះ ក្រសួង​អប់រំ​បាននិងកំពុង​សិក្សា​ពង្រីក​ការ​អនុវត្តកម្មវិធីសិក្សា​ក្រៅម៉ោង ២ម៉ោងបន្ថែមនៅតាមបណ្តាសាលាបឋមសិក្សា និងមធ្យមសិក្សាឲ្យ​បាន​ច្រើន​នៅ​ទូទាំង​ប្រទេស ដើម្បីផ្លាស់ប្តូរវប្បធម៌ការរៀនគួរក្រៅម៉ោងផង និងការបំណិន​ជីវិត​សិស្ស​តាមរយៈ​ការ​សិក្សា​ភាសាបរទេស និងមុខវិជ្ជាផ្សេងទៀតផង ខណៈបច្ចុប្បន្ន​ក្រសួង​បាននិង​កំពុង​អនុវត្ត​សាកល្បង​បានចំនួន២០សាលារួចហើយ។

សូមបញ្ជាក់ថា នៅក្នុងសេចក្តីថ្លែងការណ៍ក្រសួងអប់រំ នៅថ្ងៃទី៧ ខែឧសភា ឆ្នាំ២០២៤នេះ ក៏​បាន​ណែនាំអំពាវនាវទៅដល់គ្រប់លោកគ្រូអ្នកគ្រូ គណៈគ្រប់គ្រងគ្រប់គ្រឹះស្ថាន​សិក្សា​សាធារណៈ​មិន​ត្រូវ​បង្ខិតបង្ខំសិស្សឱ្យរៀនគួ និងមិនត្រូវយកមេរៀនឬលំហាត់បង្រៀនគួរ ដើម្បីធ្វើ​ជា​វិញ្ញាសា​ប្រឡង​ប្រចាំខែ ប្រចាំឆ្នាំផ្សេងៗ និងណែនាំសាលាត្រូវរៀបចំនិងអនុវត្តកម្មវិធីក្រៅម៉ោងសិក្សា ដើម្បី​បង្កើនម៉ោងស្វ័យសិក្សាយ៉ាងតិច ២ម៉ោងបន្ថែម ហើយ​មាតាបិតាត្រូវយកចិត្តទុកដាក់​ត្រួត​ពិនិត្យនិងលើកទឹកចិត្តឱ្យកូនធ្វើស្វ័យសិក្សា និងរៀនសូត្រនៅផ្ទះជាដើម៕ អត្ថបទ៖ ស៊ុម សុខជា