ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន(UNRWA) នឹងបិទទីស្នាក់ការកណ្តាលរបស់ខ្លួន នៅក្រុងហ្ស៊េរុយសាឡឹមខាងកើត បន្ទាប់ពីបរិវេណនេះ ត្រូវបានដុតបំផ្លាញដោយក្រុមជ្រុលនិយមអ៊ីស្រាអែល ខណៈដែលបុគ្គលិក កំពុងនៅខាងក្នុងនោះ។

នៅក្នុងសេចក្តីថ្លែងការណ៍មួយនៅលើវេទិកាសង្គម X អគ្គស្នងការ UNRWA លោក Philippe Lazzarini បាននិយាយថា ការវាយប្រហារដោយបង្កឲ្យភ្លើងឆាបឆេះ គឺជាឧប្បត្តិហេតុចុងក្រោយបង្អស់នៃការគំរាមកំហែង ការយាយី និងឧប្បត្តិហេតុហិង្សាដែលប្រព្រឹត្តដោយជនជាតិអ៊ីស្រាអែលប្រឆាំងនឹងបុគ្គលិករបស់ទីភ្នាក់ងារនេះ ក្នុងរយៈពេលពីរខែកន្លងទៅនេះ។

លោក Lazzarini បាននិយាយថា៖«ល្ងាចនេះ អ្នកស្រុកអ៊ីស្រាអែល បានដុតពីរលើកនៅបរិវេណនៃទី ស្នាក់ការកណ្តាលរបស់ UNRWA នៅទីក្រុងហ្ស៊េរុយសាឡឹមខាងកើតដែលគ្រប់គ្រងដោយអ៊ីស្រាអែល។ រឿងនេះ បានកើតឡើង ខណៈពេលដែល UNRWA និងបុគ្គលិករបស់ទីភ្នាក់ងារអង្គការសហប្រជាជាតិផ្សេងទៀត នៅក្នុងបរិវេណនោះ»។

«នេះគឺជាការវិវឌ្ឍដ៏គួរឲ្យព្រួយបារម្ភ។ ជាថ្មីម្តងទៀត ជីវិតបុគ្គលិកអង្គការសហប្រជាជាតិ កំពុងប្រឈមនឹងហានិភ័យយ៉ាងធ្ងន់ធ្ងរ»។

លោកបានបន្ថែមថា កន្លែងនេះ នឹងត្រូវបិទ «រហូតដល់សន្តិសុខត្រឹមត្រូវ ត្រូវបានស្ដារឡើងវិញ»។

លោក Lazzarini បានបង្ហោះវីដេអូនៃបរិវេណដែលបង្ហាញពីបុគ្គលិកព្យាយាមពន្លត់ភ្លើង ខណៈពេលដែលមនុស្សស្រែកនៅខាងក្រៅ ហើយបាននិយាយថា ហ្វូងមនុស្សអមដោយបុរសប្រដាប់អាវុធ ត្រូវបានគេឃើញនៅខាងក្រៅបរិវេណដែលស្រែកថា «ដុតបំផ្លាញអង្គការសហប្រជាជាតិ»ឲ្យខ្ទេចទាំងស្រុង។