បច្ចុប្បន្នសាលារៀនរដ្ឋ មួយចំនួនពិសេសកម្រិតបឋមសិក្សា បានផ្លាស់ប្ដូរពីការសិក្សាមួយពេល ទៅជាការសិក្សាពេញមួយថ្ងៃ ទាំងពេលព្រឹក និងរសៀល។ បើតាម លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បញ្ជាក់ថា សាលារៀនរដ្ឋចំនួន ២០ កំពុងអនុវត្តសាកល្បងលើការសិក្សាពេញមួយថ្ងៃនេះ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានឱ្យដឹងថា ការសិក្សាពេញមួយថ្ងៃនេះ ជាការផ្លាស់ប្ដូរថ្មី សម្រាប់សាលារៀនរដ្ឋ ដែលជាទូទៅការសិក្សានៅកម្រិតបឋមសិក្សា គឺសិក្សាត្រឹមមួយវេនតែប៉ុណ្ណោះ។ សម្រាប់ការផ្លាស់ប្ដូរទៅសិក្សាពេញមួយថ្ងៃនេះ ជាចំណុចចាប់ផ្ដើម ដែលសាលារៀនចំនួន ២០បាននឹងកំពុងអនុវត្តសាកល្បង។
អ្នកនាំពាក្យ បញ្ជាក់ថា ការផ្លាស់ប្ដូរទៅសិក្សាពេញមួយថ្ងៃនេះ គឺទាមទារជាចាំបាច់នូវការគាំទ្រពីសហគមន៍ ពីអាណាព្យាបាលសិស្ស ក៏ដូចជាក្រសួងអប់រំ ក្នុងការបើកដំណើរការដោយរលូន។ ការសិក្សាពេញមួយថ្ងៃនេះផ្ដល់ជាផលវិជ្ជមានច្រើនសម្រាប់សិស្ស ដោយរាប់បញ្ចូលទាំងការកើននូវចំណេះដឹងចរិយាសម្បទា ក៏ដូចជាបំណិន។ រីឯការសិក្សា ក៏ដាក់បញ្ចូលថែមទាំង ភាសាអង់គ្លេស ក៏ដូចជាកំព្យូទ័រផងដែរ។
ក្នុងចំណោមសាលារៀនទាំង ២០ ដែលកំពុងអនុវត្តសាកល្បងនេះ ក៏មានសាលាបឋមសិក្សាអ្នកឧកញ៉ាមហាភក្ដី ហ៊ុន នាង ព្រែកកំពឹស ស្ថិតក្នុងភូមិសាស្ត្រខណ្ឌដង្កោ រាជធានីភ្នំពេញ បានផ្ដើមអនុវត្តនៅក្នុងឆ្នាំសិក្សា ២០២៣-២០២៤ផងដែរ។ លោក ផុន ណាត នាយកសាលា បានលើកឡើងថា ការអនុវត្តសាកល្បងនេះ គឺចាប់ផ្ដើមពីថ្នាក់មតេយ្យរហូតដល់ថ្នាក់ទី៦។ លោកថាសាលាពុំទាន់អនុវត្តការសិក្សាពេញមួយថ្ងៃ១០០ភាគរយនោះទេ។ បច្ចុប្បន្នសិស្សប្រមាណ៥០ភាគរយ បានចូលសិក្សាពេញមួយថ្ងៃ រីឯសិស្សដទៃទៀតពុំទាន់មានការអនុញ្ញាតពីអាណាព្យាបាលនោះទេ។ លោកនាយកសាលាលើកឡើងថា ការសិក្សាពេញមួយថ្ងៃក្នុងដំណាក់កាលដំបូងនេះសាលាក៏បានដាក់ការសិក្សាបន្ថែមលើភាសាងង់គ្លេសផងដែរ។
សម្រាប់អាណាព្យាបាល ដែលកំពុងរង់ចាំកូនសិក្សាពេញមួយថ្ងៃនៅសាលាមួយនេះ លើកឡើងថាពួកគាត់គាំទ្រ ចំពោះការសិក្សាពេញមួយថ្ងៃ។ ការគាំទ្រដោយសារមើលឃើញថា កូនចៅរបស់ពួកគាត់មានការចេះដឹងច្រើនជាងមុន និងមិនមានពេលវេលាលេងច្រើនដូចមុន។
ការសិក្សាពេញមួយថ្ងៃនេះក៏មានការបង់ជាវិភាគទានមួយចំនួន សម្រាប់ទ្រទ្រង់ដំណើរការរៀន និងបង្រៀនឱ្យមាននិរន្តរភាពផងដែរ។ ជាក់ស្ដែងសម្រាប់ការសិក្សាពេញមួយថ្ងៃនៅសាលាបឋមសិក្សាអ្នកឧកញ្ញាមហាភក្ដី ហ៊ុន នាង ព្រែកកំពឹស គឺបង់វិភាគទាន ចំនួន៤ម៉ឺនរៀលក្នុងមួយខែ៕
អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
