​បាល់ទាត់៖ កីឡាករ​ជម្រើស​ជាតិ​យុវជន​អាយុ​ក្រោម ១៩​ឆ្នាំ​កម្ពុជា លីម អា​រុណ រ៉េ​យ​មិន ត្រូវ​បាន​សហព័ន្ធ​កីឡា​បាល់ទាត់​កម្ពុជា​ (FFC) និង​សហព័ន្ធ​កីឡាបាល់ទាត់​ទ្វីប​អាស៊ី​ (AFC) ជ្រើសរើស​ជា​អគ្គរដ្ឋទូត​សុ​ឆន្ទៈ​ខាង​ផ្នែក​ទំនួល​ខុសត្រូវ​ របស់​វិស័យ​កីឡាបាល់ទាត់​ចំពោះ​សង្គម (eGoal Social Responsibility Ambassador)។ នេះ​បើតាម​ការបញ្ជាក់​របស់​សហព័ន្ធ​កីឡាបាល់ទាត់​កម្ពុជា។​

​ក្រោយ​ការជ្រើសរើស​នេះ លីម អា​រុណ បានធ្វើ​បទ​បង្ហាញ​តាមរយៈ​សិក្ខាសាលា Online មួយ ស្ដីពី​តួនាទី និង​ការចូលរួមចំណែក​ដ៏​សំខាន់​របស់​វិស័យ​កីឡាបាល់ទាត់ ក៏ដូចជា​យុវជន​នៅ​ក្នុង​សង្គមចំពោះ​ការជួយជ្រោមជ្រែងលើកស្ទួយ និង​ថែរក្សា​និរន្តរភាព​សម្រាប់​បរិស្ថាន សង្គម និង​សេដ្ឋកិច្ច​តទៅ​ថ្ងៃ​អនាគត​ប្រកបដោយ​ចេរភាព ដើម្បី​ផ្សព្វផ្សាយ និង​ចែករំលែក​ចំណេះដឹង និង​សារៈសំខាន់ៗ​ជូន​យុវជន យុវនារី និង​កុមារ​នៃ​អង្គរ Flame Cambodia កាលពី​ចុង​សប្ដាហ៍​កន្លងទៅ។​

សិក្ខាសាលា​នេះ ក្រៅពី​វត្តមាន​របស់​សមាជិក​ក្លិប​បឹងកេត ក៏មាន​ការចូលរួម​ពី​អ្នកចាត់ការ​ក្រុម​ជម្រើសជាតិ​កម្ពុជា​លោក ឈូក ពិសិដ្ឋ ក៏ដូចជា​លោក លីម គុណ ​ឪពុករបស់​កីឡាករ លីម អា​រុណ រ៉េ​យ​មិន រួមទាំង​ថ្នាក់ដឹកនាំ​អង្គរ Flame Cambodia ព្រមជាមួយ​យុវជន យុវនារី​ប្រមាណ ១៥​នាក់​ទៀត។ ទន្ទឹម​ជាមួយគ្នា សហព័ន្ធ​កីឡាបាល់ទាត់​កម្ពុជាបានធ្វើការ​វាយតម្លៃ​ខ្ពស់ ចំពោះ​ការខិតខំ​ប្រឹងប្រែង​រប​ស់​កីឡាករ លីម អា​រុណ រ៉េ​យ​មិន ក្នុងការ​បំពេញ​តួនាទី​ខ្លួន​ប្រកបដោយ​ជោគជ័យ៕

​អត្ថបទ៖ លី ឈុន​ឡា