អតីតសមាជិកព្រឹទ្ធសភា និងជាអភិបាលក្រុងស្តីទីនៃទីក្រុងតូចមួយរបស់ប្រទេសហៃទី ត្រូវបានចោទប្រកាន់ជុំវិញការស្លាប់របស់អ្នកសារព័ត៌មានម្នាក់ ដែលត្រូវបានសម្លាប់កាលពីឆ្នាំ ២០១៩ ចំពេលមានវិបត្តិនយោបាយកាន់តែធ្ងន់ធ្ងររបស់ប្រទេសនេះ បានបង្កឲ្យមានការតវ៉ា និងអំពាវនាវឲ្យមានការស៊ើបអង្កេតបន្ទាប់ពីគាត់ បានក្លាយជាអ្នកកាសែតទី៣នៅក្នុងប្រទេសដែលត្រូវបានសម្លាប់ នៅក្នុងរយៈពេលមិនដល់ ពីរឆ្នាំផងនោះ។

ពិធីករវិទ្យុដ៏ពេញនិយមនៃកម្មវិធីជជែកអំពីសង្គមនយោបាយ លោក Néhémie Joseph បានធ្វើការឲ្យវិទ្យុ Radio Panic FM នៅក្នុងប្រទេសហៃទី និងវិទ្យុ Mega ដែលមានមូលដ្ឋាន នៅទីក្រុងម៉ៃអាមី (Miami) នៅពេលដែលសាកសពគាត់ជាប់ដោយគ្រាប់កាំភ្លើងជាច្រើនគ្រាប់ ត្រូវបានគេប្រទះឃើញដាក់ក្នុងឃ្លុបក្រោយនៃរថយន្តរបស់គាត់ ដែលចតនៅច្រកចូលទីក្រុង Mirebalais នៅតំបន់ខ្ពង់រាបកណ្តាលនៃប្រទេសហៃទី។

លោក Rony Célestin អតីតសមាជិកព្រឹទ្ធសភា ដែលតំណាងឲ្យតំបន់កសិកម្ម និងលោក Lochard Laguere ដែលនៅតែបម្រើការជាអភិបាលក្រុង Mirebalais បើទោះបីជាផុតអាណត្តិផ្លូវការរបស់គាត់ ត្រូវបានបញ្ជាឲ្យធ្វើការកាត់ក្តីនៅចំពោះមុខគណៈវិនិច្ឆ័យ។ ចៅក្រមស៊ើបសួរក្នុងសំណុំរឿងនេះ ចង់ចាប់ខ្លួនពួកគេ ដោយចោទប្រកាន់ពួកគេថា ជាមេខ្លោងនៃការសម្លាប់នោះ។

នៅក្នុងដីកាកាលពីថ្ងៃទី៨ ខែមីនា ដែលទើបតែត្រូវបានប្រកាសជាសាធារណៈ នាពេលថ្មីៗនេះ លោក ចៅក្រម Edwige Dorsainvil នៃសាលាដំបូងទីក្រុង Mirebalais បានសម្រេចថា មានភ័ស្តុតាងគ្រប់គ្រាន់ដើម្បីចោទប្រកាន់បុរសពីរនាក់ និង៦នាក់ផ្សេងទៀត ក្នុងការសម្លាប់អ្នកកាសែតនេះ ។

យោងតាមច្បាប់របស់ប្រទេសហៃទី ជនជាប់ចោទទាំងអស់ មានសិទ្ធិប្តឹងឧទ្ធរណ៍ចំពោះការចោទប្រកាន់ទាំងនេះ។