អូស្ត្រាលីបានប្រកាស នៅថ្ងៃសុក្រ (ទី១០ ខែឧសភា) នេះថា ខ្លួននឹងបើកការស៊ើបអង្កេតរបស់សភា ដើម្បីពិនិត្យមើលផលប៉ះពាល់អវិជ្ជមាននៃវេទិកាបណ្ដាញសង្គម ដោយនិយាយថា ពួកគេមានឥទ្ធិពល និងការគ្រប់គ្រងយ៉ាងធំលើការបង្ហោះដែលប្រជាជនអូស្ត្រាលីមើលឃើញតាមប្រព័ន្ធអ៊ីនធឺណិត ដែលវាស្ទើរតែគ្មានការត្រួតពិនិត្យអ្វីសោះ។

រដ្ឋាភិបាលបានរិះគន់វេទិការបស់បណ្ដាញសង្គមថា មិនមានភាពលឿនរហ័សគ្រប់គ្រាន់ ក្នុងការលុបចោលនូវរាល់ការបង្ហោះដែលមានអំពើហិង្សា និងស្វែងរកការត្រួតពិនិត្យបន្ថែមលើខ្លឹមសារដែលត្រូវបានបង្ហោះនៅលើបណ្ដាញសង្គម Facebook របស់ក្រុមហ៊ុន Meta បណ្ដាញសង្គម TikTok របស់ក្រុមហ៊ុន ByteDance និងបណ្ដាញសង្គម X ដែលកម្មសិទ្ធិរបស់លោក Elon Musk។

នាយករដ្ឋមន្ត្រីអូស្ត្រាលី លោក Anthony Albanese បានប្រាប់អ្នកសារព័ត៌មានថា៖ «សម្រាប់បញ្ហាជាច្រើន មិនថា វាជាបញ្ហានៃអំពើហិង្សាក្នុងគ្រួសារ មិនថាវាជាបញ្ហារបស់យុវជនរបស់យើង នៅតាមតំបន់ជាច្រើន អ្វីដែលបន្តលេចឡើងម្តងហើយម្តងទៀត គឺជាតួនាទីរបស់បណ្ដាញសង្គម។ ពួកគេអាចមានភាពវិជ្ជមានខ្លាំង ប៉ុន្តែក៏អាចមានឥទ្ធិពលអវិជ្ជមានផងដែរ»។

គួរបញ្ជាក់ថា រដ្ឋាភិបាលគណបក្សការងាររបស់លោក Albanese កំពុងតែមានជម្លោះផ្លូវច្បាប់រួចហើយជាមួយបណ្ដាញសង្គម X របស់លោក Musk ជុំវិញបទប្បញ្ញត្តិដែលស្នើឲ្យវេទិកានេះលុបវីដេអូនៃការវាយប្រហារដោយចាក់នឹងកាំបិតទៅលើសង្ឃជាន់ខ្ពស់ក្នុងវិហារគ្រិស្តសាសនា Assyrian ក្នុងទីក្រុងស៊ីដនី កាលពីខែមេសា៕