មន្ត្រីទីក្រុង New Delhi កាលពីថ្ងៃព្រហស្បតិ៍ (ទី៩ ខែឧសភា) បាននិយាយថា ប្រទេសឥណ្ឌាបានដាក់ជំនួសទាហានប្រមាណជា ៨០នាក់ នៅលើកោះម៉ាល់ឌីវដោយជនស៊ីវិលវិញ បន្ទាប់ពីមានការទាមទាររបស់ប្រធានាធិបតីលោក Mohamed Muizzu ជាមេដឹកនាំដែលបានផ្លាស់ប្ដូររបត់ទំនាក់ទំនងរបស់ប្រជុំកោះនេះទៅប្រទេសចិនវិញ។

កងទ័ពឥណ្ឌាបានឧបត្ថម្ភឧទ្ធម្ភាគចក្រ ២គ្រឿង និងយន្តហោះ ១គ្រឿងដែលត្រូវបានផ្តល់ឲ្យដោយទីក្រុង New Delhi ហើយភាគច្រើនប្រើសម្រាប់ប្រតិបត្តិការឃ្លាំមើលដែនសមុទ្រ ការស្វែងរក និងជួយសង្គ្រោះ និងការជម្លៀសផ្នែកវេជ្ជសាស្រ្តនៅលើប្រជុំកោះនេះ ដែលមានប្រជាជនប្រហែលកន្លះលាននាក់។

ក្នុងជំនួបជាមួយរដ្ឋមន្ត្រីការបរទេសម៉ាល់ឌីវ លោក Moosa Zameer នៅប្រទេសឥណ្ឌា ដែលជាដំណើរទស្សនកិច្ចលើកដំបូងរបស់មន្ត្រីជាន់ខ្ពស់ កិតចាប់តាំងពីលោក Muizzu ចូលកាន់តំណែង កាលពីខែវិច្ឆិកាឆ្នាំមុន រដ្ឋមន្ត្រីការបរទេសឥណ្ឌាលោក Subrahmanyam Jaishankar បាននិយាយថា វាជាផលប្រយោជន៍រួមរបស់ប្រទេសទាំង២ ក្នុងការស្វែងយល់ថា តើវិធីណាល្អដែលល្អបំផុត ដើម្បីធ្វើឲ្យទំនាក់ទំនងឆ្ពោះទៅមុខ។ ហើយបន្ទាប់មក អ្នកនាំពាក្យក្រសួងការបរទេសឥណ្ឌា លោក Randhir Jaiswal បាននិយាយថា ទាហានត្រូវបានដាក់ជំនួសវិញដោយបុគ្គលិកបច្ចេកទេស។

សូមបញ្ជាក់បន្ថែមថា ជាប្រពៃណី មេដឹកនាំប្រទេសម៉ាល់ឌីវ បានយកទីក្រុង New Delhi ជាកន្លែងឈប់សំចតលើកដំបូងរបស់ពួកគេ បន្ទាប់ពីឡើងកាន់តំណែង ប៉ុន្តែលោក Muizzu បានជ្រើសរើសប្រទេសចិនជំនួសវិញ និងបានធ្វើទំនាក់ទំនងការពារជាតិកាន់តែស៊ីជម្រៅ ក្នុងខណៈពេលដែលបណ្ដាប្រទេសមហាអំណាចពិភពលោក កំពុងប្រជែងដណ្ដើមឥទ្ធិពលនៅក្នុងតំបន់ឥណ្ឌូ-ប៉ាស៊ីហ្វិក៕