ប្រធានាធិបតីរុស្ស៊ី លោក Vladimir Putin នៅថ្ងៃសុក្រ (ទី១០ ខែឧសភា) បានស្នើឲ្យមានការតែងតាំងឡើងវិញនូវតំណែងនាយករដ្ឋមន្រ្តីលោក Mikhail Mishustin ជាអ្នកគាំទ្របច្ចេកទេស ដែលបានជួយលោកឲ្យឆ្លងកាត់សង្រ្គាមនៅអ៊ុយក្រែន និងបញ្ហាប្រឈមផ្នែកសេដ្ឋកិច្ច ក្នុងពេលមានទណ្ឌកម្មពីលោកខាងលិច ជុំវិញការលុកលុយរបស់ទីក្រុងមូស្គូលើទីក្រុងគីវ។

ការអនុម័តរបស់សភា Duma ចំពោះឥស្សរជនមិនសូវលេចមុខមាត់លោក Mishustin នេះ គឺស្ទើរតែប្រាកដ ១០០ភាគរយហើយ ដោយសារស្ទើរតែគ្មានសំឡេងប្រឆាំងទាល់តែសោះនៅក្នុងសភា ដែលបានគាំទ្រលោក Putin នូវការសម្រេចចិត្តទាំងអស់របស់លោក ក្នុងនោះរួមទាំងការលុកលុយ ក្នុងខែកុម្ភៈ ឆ្នាំ២០២២ លើប្រទេសជិតខាងតូចជាងរុស្ស៊ីផងដែរ។

ដូចដែលច្បាប់បានកំណត់ រដ្ឋាភិបាលបានលាលែងពីតំណែងសិន មុននឹងលោក Putin ដែលជាមេដឹកនាំកំពូលរបស់រុស្ស៊ីអស់រយៈពេលជិត ១ភាគ៤នៃសតវត្សរ៍នេះ បានស្បថចូលកាន់តំណែងរយៈពេល ៦ឆ្នាំទៀត កាលពីថ្ងៃអង្គារដើមសប្ដាហ៍នេះ បន្ទាប់ពីទទួលបានការជាប់ឆ្នោតឡើងវិញ ជាមួយនឹងសំឡេងគាំទ្រយ៉ាងច្រើនសលើសលប់ នៅក្នុងខែមីនា។

អ្វីដែលសំខាន់នោះ គឺថា មិនមានការចង្អុលបង្ហាញណាមួយដែលថា លោក Putin មានគម្រោងរុះរើឡើងវិញនោះឡើយ ចំពោះរដ្ឋាភិបាល ដែលរួមមានទាហានជើងចាស់លោក Sergei Shoigu ទទួលបន្ទុកការពារជាតិរបស់រុស្ស៊ី តាំងពីឆ្នាំ២០១២ និងរដ្ឋមន្ត្រីការបរទេស Sergei Lavrov ដែលទទួលបន្ទុកផ្នែកការទូតរបស់រុស្ស៊ីអស់រយៈពេល ២ទសវត្សរ៍។

បណ្ដាអ្នកវិភាគលើកឡើងថា ការបន្តរក្សារដ្ឋាភិបាលដើមរបស់លោកឲ្យនៅដដែលនេះ នឹងផ្ញើសារអំពីស្ថិរភាព និងអំពីការពេញចិត្តរបស់លោក Putin ចំពោះការរីកចម្រើនរបស់ក្រុមលោក ទាំងនៅក្នុង និងក្រៅប្រទេស៕