ផ្ទះសម្បែងនិងរថយន្តជាច្រើនគ្រឿងដែលឆេះខ្លោចនៅក្នុងភូមិលើកំពូលភ្នំដែលហ៊ុមព័ទ្ធដោយព្រៃអូលីវ គឺជាការរំលឹកដ៏ក្រៀមក្រំនៃភាពងាយរងគ្រោះរបស់ប្រជាជនប៉ាឡេស្ទីនចំពោះការកើនឡើងនៃអំពើហិង្សាពីអ្នកតាំងលំនៅអ៊ីស្រាអែល។

ប្រធានក្រុមប្រឹក្សាភូមិ បាននិយាយថា បំណែកបាក់បែកនៅតាមបណ្តោយផ្លូវធំនៃភូមិ Duma គឺជាលទ្ធផលនៃការវាយប្រហាររយៈពេល ៣ម៉ោង នៅពាក់កណ្តាលខែមេសា ដែលបានធ្វើឲ្យផ្ទះចំនួន ១៥ខ្នងរងការខូចខាតដោយភ្លើងឆេះ និង មនុស្ស ៦នាក់ រងរបួសដោយត្រូវគ្រាប់កាំភ្លើង។ នេះ គឺជាការវាយប្រហារមួយក្នុងការវាយប្រហាររបស់អ្នកតាំងលំនៅជិត ៨០០លើកប្រឆាំងនឹងជនជាតិប៉ាឡេស្ទីន នៅតំបន់វេសបែងដែលកាន់កាប់ដោយអ៊ីស្រាអែល ចាប់តាំងពីក្រុមហាម៉ាស បានវាយប្រហារអ៊ីស្រាអែលពីតំបន់ហ្កា ហ្សាស្ទ្រីប កាលពីថ្ងៃទី៧ ខែតុលា បើយោងតាមអង្គការសហប្រជាជាតិ។

អ្វីដែលឆេះ នៅសល់ក្នុងភូមិឌូម៉ា ក៏បានគូសបញ្ជាក់ពីធនធានមានកម្រិតរបស់ភូមិក្នុងការសម្អាត និងកសាងឡើងវិញ អនុញ្ញាតឲ្យការពារខ្លួនពីការលុកលុយនាពេលខាងមុខ ដែលហាក់ដូចជាជៀសមិនរួច        ខណៈដែលអ្នកតាំងលំនៅដែលប្រើកាំភ្លើង ដើរល្បាតក្នុងតំបន់មានចម្ងាយប្រហែល ២០ម៉ាយ ភាគខាងជើងនៃក្រុងហ្ស៊េរុយសាឡឹម។

លោក Suleiman Dawabsha ប្រធានក្រុមប្រឹក្សាភូមិសម្រាប់សហគមន៍ដែលមានប្រជាជនជាង ២.០០០នាក់នេះ បាននិយាយថា៖«យើងជាអ្នកភូមិឌូម៉ា... មិនមានអំណាច ដើម្បីការពារខ្លួនទេ»។ លោកប៉ាន់ប្រមាណថា ការវាយប្រហារនេះ បានបង្កការខូចខាតគិតជាទឹកប្រាក់ចំនួន ៥លានសេកែល (១,៣ លានដុល្លារ)។