រដ្ឋមន្ត្រីការបរទេសលីបង់ លោក  Abdallah Bou Habib បាននិយាយកាលពីថ្ងៃព្រហស្បតិ៍ថា ប្រទេសរបស់លោក បានស្នើសុំជំនួយពីកាតា ដើម្បីជម្លៀសស្ត្រីលីបង់ចេញពីតំបន់ហ្កាហ្សា តាមរយៈច្រករ៉ាហ្វា (Rafah)។

ទីភ្នាក់ងារសារព័ត៌មានជាតិលីបង់ បានរាយការណ៍ថា លោក Bou Habib បានលើកឡើងថា៖«យើងបានស្នើសុំជំនួយពីកាតា ដើម្បីនាំយកស្ត្រីលីបង់ និងក្រុមគ្រួសាររបស់ពួកគេ ចេញពីតំបន់ហ្កាហ្សា តាមរយៈច្រករ៉ាហ្វា ដោយសារពួកគេ បានជាប់ខ្លួន តាំងពីការចាប់ផ្តើមនៃការឈ្លានពានលើតំបន់ហ្កាហ្សា ទោះបីជាមានកិច្ចប្រឹងប្រែងពីមុនរបស់យើង ក្នុងការនាំយកពួកគេត្រឡប់មកប្រទេសវិញក៏ដោយ។

លោក Bou Habib បានធ្វើការអត្ថាធិប្បាយនេះ បន្ទាប់ពីជួបជាមួយឯកអគ្គរដ្ឋទូតកាតាប្រចាំប្រទេសលីបង់លោក Saud bin Abdul Rahman Al-Thani។

ទន្ទឹមនឹងនេះ លោក Bou Habib បានសរសើរតួនាទីស្ថាបនារបស់ប្រទេសកាតា ក្នុងការជួយប្រទេសលីបង់ ឲ្យរួចផុតពីវិបត្តិប្រធានាធិបតីរបស់ខ្លួន។

ប្រទេសកាតា កំពុងធ្វើការតាមរយៈក្រុមប្រទេសចំនួន៥ ទៅលើប្រទេសលីបង់ ដែលរួមមានកាតា អេហ្ស៊ីប អារ៉ាប៊ីសាអ៊ូឌីត បារាំង និងសហរដ្ឋអាមេរិក ដើម្បីជួយប្រទេសនេះ ពន្លឿនការបោះឆ្នោតប្រធានាធិបតី និងកំណែទម្រង់ហិរញ្ញវត្ថុ និងសេដ្ឋកិច្ច។