ប្រទេសឥណ្ឌាកាលពីថ្ងៃព្រហស្បតិ៍ បានជំរុញឲ្យប្រទេសម៉ាល់ឌីវដែលគាំទ្រចិន  បន្ធូរបន្ថយភាពតានតឹងនិងកែលម្អទំនាក់ទំនងដ៏តានតឹងរបស់ពួកគេឡើងវិញ។

រដ្ឋមន្ត្រីការបរទេសនៃប្រទេសឥណ្ឌា និងម៉ាល់ឌីវ បានជួបប្រជុំគ្នានៅទីក្រុងញូវដែលី មួយថ្ងៃមុនថ្ងៃកំណត់ដែលកំណត់ដោយប្រធានាធិបតីថ្មីរបស់ម៉ាល់ឌីវ លោក Mohamed Muizzu សម្រាប់ឥណ្ឌា ដើម្បីដកទាហានរបស់ខ្លួនរាប់សិបនាក់ ចេញពីប្រទេសប្រជុំកោះ។

ភាពតានតឹងរវាងឥណ្ឌា និងម៉ាល់ឌីវ បានកើនឡើង ចាប់តាំងពី លោក Muizzu ដែលគាំទ្រចិន ឡើងកាន់អំណាច កាលពីឆ្នាំមុន។

រដ្ឋមន្ត្រីការបរទេសឥណ្ឌា លោក Subrahmanyam Jaishankar បានប្រាប់សមភាគីម៉ាល់ឌីវរបស់លោក គឺលោក Moosa Zameer ថា ប្រទេសឥណ្ឌា គឺជាអ្នកផ្តល់ជំនួយអភិវឌ្ឍន៍ដ៏សំខាន់ រួមទាំងគម្រោងហេដ្ឋារចនាសម្ព័ន្ធ ការថែទាំវេជ្ជសាស្រ្ត និងគ្រឿងបរិក្ខារពេទ្យ។

សេចក្តីថ្លែងការណ៍មួយរបស់ក្រសួងការបរទេសរបស់ប្រទេសឥណ្ឌា បានដកស្រង់សម្តីលោក Jaishankarថា៖«នេះ គឺជាផលប្រយោជន៍រួមរបស់យើង យើងឈានដល់ការយល់ដឹងអំពីរបៀបដែលយើងអាចនាំទំនាក់ទំនងរបស់យើង ទៅមុខបានល្អបំផុត»។